Icelandair Group og Bain Capital sömdu í gær um að Bain leggi flugfélaginu til 8,1 milljarð króna í nýtt hlutafé og fái fyrir vikið 16,6 prósent hlut. Um er að ræða kaup á genginu 1,43. Þetta kemur fram í tilkynningu til Kauphallarinnar.

Samkomulagið er með fyrirvara um samþykki hluthafafundar, og að hluthafar falli frá forgangsrétti að nýjum hlutum í félaginu.

Í samkomulaginu skilyrði um að Bain Capital fái fulltrúa í stjórn félagsins. Úlfar Steindórsson mun stíga til hliðar sem stjórnarmaður í félaginu verði viðskiptin samþykkt á hluthafafundi.

Icelandair Group gerir ráð fyrir að halda hluthafafund hinn 23. júlí 2021. Hömlur eru á viðskiptum með hina nýju hluti í 180 daga frá töku þeirra til viðskipta á Aðalmarkaði Nasdaq Iceland.

Bain Capital mun að auki fá áskriftarréttindi fyrir hlutum sem samsvara 25 prósent af heildarfjölda þeirra nýju hluta sem gefnir verða út. Heimildin gildir í tíu daga frá og með birtingu uppgjörs félagsins fyrir annan ársfjórðung 2022. Áskriftarréttindin veita Bain heimild, en ekki skyldu, til kaupa á nýjum almennum hlutum í félaginu á sama gengi á hvern hlut að viðbættum 15 prósent ársvöxtum.

„Hlutafjáraukningin mun styrkja fjárhagsstöðu Icelandair Group enn frekar og auka fjárhagslegt bolmagn félagsins til að nýta þau tækifæri sem munu skapast í þeirri fordæmalausu stöðu sem nú er uppi á flugmörkuðum,“ segir í tilkynningunni.

Bogi Nils Bogason, forstjóri Icelandair Group, segir að það sé mikið gleðiefni að bjóða Bain Capital velkomin í fjölbreyttan hluthafahóp flugféalgsins. „Við erum ánægð með að fá í hópinn leiðandi fjárfesti á heimsvísu með mikla þekkingu á fluggeiranum. Samkomulagið er auk þess mikilvæg viðurkenning á því ötula starfi sem starfsfólk Icelandair hefur unnið til að tryggja bjarta framtíð félagsins. Við hlökkum til samstarfsins og að nýta þau miklu tækifæri sem við sjáum í viðskiptalíkani Icelandair eftir heimsfaraldurinn.“

Matthew Evans, framkvæmdastjóri Bain Capital Credit, segist spenntur fyrir því að bæta Icelandair Group í fjölbreytt eignasafn fjárfestingafélagsins í flugtengdri starfsemi. „Þó líklegt sé að það taki ferðaþjónustu í heiminum nokkurn tíma að ná fullum styrk á ný, deilum við þeirri trú með stjórnendum Icelandair að viðskiptalíkan félagsins sé mjög samkeppnishæft til lengri tíma og að félagið hafi rekstrarsögu sem setur það í kjörstöðu til þess að nýta sér þau tækifæri sem verða til nú þegar heimsfaraldurinn er í rénun. Við erum sannfærð um að víðtæk reynsla okkar úr fluggeiranum og virðisaukandi nálgun muni styðja við vöxt Icelandair til hagsbóta fyrir alla hluthafa.“

Bain Capital hefur yfir 1.200 starfsmenn og er eignasafn hans metið á um 130 milljarða Bandaríkjadala. Mitt Romney, fyrrverandi forsetaframbjóðandi Bandaríkjanna, kom að stofnun félagsins árið 1984 og stýrði því til ársins 2002.