Íslandsbanki hagnaðist um 5,4 milljarða króna á örðum ársfjórðungi, samkvæmt drögum að uppgjöri sem liggja fyrir. Miðað við það var arðsemi eigin fjár á ársgrundvelli 11,6 prósent sem er umfram fjárhagsleg markmið bankans. Þetta kemur fram í tilkynningu til Kauphallarinnar.

Til samanburðar nam hagnaður bankans um 3,6 milljörðum króna á fyrsta ársfjórðungi 2021 og arðsemi eiginfjár 7,7 prósent.

Frávikin frá fyrsta ársfjórðungi og markmiðum bankans skýrast að stærstum hluta af því að virðisrýrnun var jákvæð en um 1,1 milljarður króna var færður til tekna vegna þess á fjórðungnum.

Til samanburðar færði bankinn um 0,5 milljarða króna til gjalda á í virðisrýrnun á fyrsta ársfjórðungi ársins. Þá höfðu hækkanir á innlendum hlutabréfamörkuðum einnig jákvæð áhrif á afkomu fjórðungsins, að því er segir í tilkynningunni.

Áréttað er að uppgjörið fyrir annan ársfjórðung 2021 er enn í vinnslu og getur tekið breytingum fram að birtingardegi þann 28. júlí næstkomandi.