Í tilkynningu frá ISAVIA segir að ákvörðun EasyJet að bæta við nýjum áfangastað sé einkar ánægjuleg og skýrt merki um það hve vinsæll ferðamannastaður Ísland sé. „Eftirspurnin er greinilega mikil og við fögnum því. Það verður spennandi fyrir okkur að taka á móti fyrsta flugi EasyJet frá Mílanó til Íslands í næsta mánuði,“ segir Grétar Már Garðarsson, forstöðumaður flugfélaga og leiðarþróunar hjá ISAVIA.

Líf er að færast í Keflavíkurflugvöll eftir Covid-19 faraldurinn og flugferðum um völlinn fjölgar stöðugt. Búast má við að 24 flugfélög muni fljúga um Keflavíkurflugvöll í sumar, tveimur fleiri en flugu um völlinn í fyrra.

„Lorenzo Lagorio, svæðisstjóri EasyJet á Ítalíu segir: „Þökk sé þessari nýrri flugleið gefst viðskiptavinum EasyJet tækifæri til að uppgötva land í Norður-Evrópu sem býður upp á einstaka náttúrufegurð. Landslagið er einstakt og kemur til með að heilla ferðamenn með eldfjöllum, jöklum og ólgandi hverum svo fátt eitt sé nefnt.“ Flugið kemur Íslendingum einnig til góða enda Mílanó nú þegar þekktur og hentugur áfangastaður fyrir íslenska ferðalanga.