Mikilvægt er að binda varanlega í lög hækkun á endurgreiðsluhlutfalli og þak á skattafrádrætti vegna rannsókna og þróunar. Þetta segir Sigríður Mogensen, sviðsstjóri iðnaðar- og hugverkasviðs Samtaka iðnaðarins, í samtali við Markaðinn. Nú er um tímabundið ákvæði að ræða. Skattafrádráttur tölvuleikjafyrirtækisins CCP á síðustu tveimur árum var umfram lögbundinn hámarksfrádrátt á hvert fyrirtæki, að því er fram kom í frétt Kjarnans. Í fyrra gat hámarksfrádráttur orðið 180 milljónir króna, en árið 2019 nam hámarkið 90 milljónum króna.

Upplýsingafulltrúi CCP rakti ástæðuna til þess að fyrirtækið ynni að tveimur þróunarverkefnum. Embætti ríkisskattstjóra sagði við vefmiðilinn að hámarkið væri hugsað þvert á fyrirtæki.Sigríður segir, aðspurð hvort frádrátturinn ætti fremur að miðast við verkefni en fyrirtæki, að það sé aðeins útfærsluatriði.

„Markmiðið með skattafrádrættinum er að auka fjárfestingu í nýsköpun sem skilar sér margfalt til baka í formi nýrra starfa, meiri útflutnings og verðmætasköpunar til framtíðar. Hvort skatturinn miðast við fyrirtæki eða verkefni er útfærsluatriði og ætti ekki að þrengja rammann of mikið enda skilar fjárfestingin sér ríkulega til baka.“Hún segir að tímabundin hækkun vorið 2020 hafi strax haft jákvæð áhrif, þar sem fyrirtæki í hugverkaiðnaði blésu til sóknar, fjölguðu starfsfólki og juku fjárfestingu í nýsköpun, en það sé ávísun á aukna verðmætasköpun.

„Vaxtartækifærin eru mikil í hugverkaiðnaði, sem er orðinn fjórða stoðin í útflutningstekjum þjóðarbúsins. Við hvetjum næstu ríkisstjórn til þess að halda áfram á þeirri braut af fullum krafti að efla samkeppnishæfni Íslands á sviði nýsköpunar og festa skattahvata í sessi til frambúðar og í raun lýsa því yfir að þeir séu komnir til að vera.“

Sigríður segir jafnframt að það muni koma til með að auka fyrirsjáanleika og leiða til þess að fyrirtæki haldi áfram að fjárfesta hér á landi og gera langtíma áætlanir. „Það er það sem skiptir öllu máli, þá sérstaklega fyrir lítil og meðalstór fyrirtæki.“