Mun meiri bjartsýni ríkir meðal stjórnenda iðnfyrirtækja nú en fyrir ári. Samkvæmt nýrri könnun Samtaka iðnaðarins meta 43 prósent þeirra aðstæður í efnahagslífinu góðar en 19 prósent slæmar. Í apríl í fyrra mátu aðeins 24 prósent aðstæðurnar góðar og 52 prósent slæmar. Hlutfallið nú er meira að segja hærra en árið 2019.

Einkum er horft til seinni helming ársins til viðsnúnings, það er meiri tekna og fleiri ráðninga starfsfólks. 42 prósent telja að tekjur verði meiri á þriðja og fjórða ársfjórðungi 2021 en þær voru 2020 og í kringum 20 prósent telja að fjöldi starfsmanna verði meiri. 20 prósent telja vera skort á starfsfólki samanborið við 10 prósent í fyrra.

„Við sjáum klár merki um viðsnúning,“ segir Ingólfur Bender, aðalhagfræðingur samtakanna. „Bæði hvað varðar mat á núverandi stöðu og framtíðarhorfur í efnahagsumhverfi iðnaðarins. Einnig hvað varðar tekjur og fjölda starfa iðnfyrirtækja. Niðurstöðurnar benda hins vegar ekki til þess að viðsnúningurinn verði snarpur. Rímar það ágætlega við spár um hægan hagvöxt á árinu.“

Picture2.png

Ingólfur segir að viðbrögð ríkisins, sveitarfélaga og Seðlabankans við efnahagsáfallinu hafi virkað til að milda höggið fyrir greinina. Aðgerðir í peningastjórnun, svo sem lækkaðir vextir og aukið aðgengi að fjármagni, hafi hjálpað og aðgerðir í opinberum fjármálum með áherslu á nýsköpun, innviði, starfsumhverfi og menntun hafi einnig skipt miklu máli.

Niðursveiflan nú hefur verið mildari fyrir iðnaðinn en margar fyrri niðursveiflur. Eðli niðursveiflunnar og hagstjórnarviðbrögð skipti þar máli. „Hagstjórnarviðbrögð við faraldrinum hafa virkað fyrir iðnaðinn líkt og hagkerfið allt,“ segir hann.

Samtökin spá ekki nákvæmlega fyrir um hvenær iðnaðurinn verði efnahagslega kominn á sama stað og fyrir faraldurinn. Ingólfur segir að það verði þó hvorki á þessu ári né því næsta.

„Það er ljóst að iðnaðurinn hefur burði til að verða drifkraftur uppsveiflunnar nú með svipuðum hætti og í síðustu uppsveiflu, þegar hann skapaði þriðjung hagvaxtarins,“ segir hann. „Greinin er stór og skapar um fimmtung landsframleiðslunnar og starfa í landinu. Vöxtur iðnaðarins er því mikilvægur fyrir vöxt hagkerfisins.“

Samtök iðnaðarins hafa framkvæmt viðhorfskannanir síðan árið 2014. Var svarhlutfallið um 20 prósent, eða 245. Fyrirtækin eru allt frá einyrkjum upp í stóra verktaka og fyrirtæki, í byggingariðnaði, framleiðslu og hugverkaiðnaði.

Ingólfur Bender aðalhagfræðingur SI