Áfengisframleiðandinn Pure Spirits í Borgarnesi hefur sett á markað Grábrók sem er átta ára gamalt skoskt viskí með íslensku vatni.

Viskíið í Grábrók er framleitt í Skotlandi, eftir skoskum hefðum, það er svo flutt til Íslands og blandað með tæru íslensku vatni úr vatnslindinni Grábrók í Borgarfirði. Þetta kemur fram í tilkynningu.

„Með því að tvinna saman aldagamlar viskí hefðir frá Skotlandi og íslenskt vatn, sem nýtur náttúrulegrar filtrunar í gegnum þúsund ára gamalt hraun,sameinast það besta frá báðum löndum sem síðan verður að hinu mjúka og ljúfa viskíi Grábrók,“ segir í tilkynningunni.

Magnús Arngrímsson, framkvæmdastjóri Pure Spirits, segir að segir íslenskt vatn blandist vel með sterku áfengi.

„Við framleiðum um 30 tegundir af vinsælu sterku áfengi sem fer víða um heim. Virkilega gott viskí með íslensku vatni er eitthvað sem okkur hefur lengi dreymt um að koma á markað. Fyrir tæpum tíu árum ákváðum við láta draum okkar verða að veruleika og fórum í þá vinnu að þróa Grábrók.,“ segir hann.

Magnús segir að það hafi þurft mikla þolinmæði að þróa gott viskí. „Viskíið hefur fengið að þroskast á tunnum í átta ár og hefur nú náð þeim gæðum að það er tilbúið til að setja á flöskur og njóta,“ segir hann.