Árshækkun íbúðaverðs mældist 15,4 prósent á landinu öllu í nóvember og í þeim mánuði seldust 43,6 prósent allra seldra íbúða yfir ásettu verði. Þetta er meðal þess sem fram kemur í mánaðarskýrslu Húsnæðis og mannvirkjastofnunar.

Jafnframt kemur fram að meðalkaupverð íbúða á landinu hafi verið 58,5 milljónir króna í nóvember síðastliðnum samanborið við 50,8 milljónir króna í nóvember árið áður. Á höfuðborgarsvæðinu var meðalkaupverð 67,6 milljónir króna en þar af var það 58 milljónir króna fyrir íbúðir í fjölbýli og 98 milljónir króna fyrir sérbýli.

Áframhaldandi samdráttur í fjölda íbúða til sölu

Í fyrstu vikunni í janúar voru 487 íbúðir til sölu á höfuðborgarsvæðinu sem er 20,2 prósent minna en 1. desember síðastliðnum fyrir rétt rúmum mánuði síðan en bæði fjöldi einbýla og íbúða í fjölbýli eru í sögulegu lágmarki. Fyrir tæpum tveimur árum, nánar til tekið í maí 2020, var fjöldi þeirra um 2.200. Meira en helmingur af íbúðum til sölu eru með fjögur herbergi eða fleiri og því hefur dregið enn meira úr minni íbúðum til sölu. Í nóvember síðastliðnum voru gefnir út 1.024 kaupsamningar um íbúðarhúsnæði á landinu öllu samanborið við 982 í október. Það gerir um 17 prósent færri kaupsamningar en voru á sama tíma árið 2020. Veltan hefur hins vegar aðeins dregist saman um 5,2 prósent enda hefur meðalkaupverð hækkað um 15,1 prósent. Í nágrannasveitarfélögum höfuðborgarsvæðisins voru kaupsamningar 200 talsins sem er met fyrir desembermánuð og sömu sögu er að segja annars staðar á landsbyggðinni þar sem fjöldi kaupsamninga var 193.

Viðskiptabankarnir ekki lengur með lægstu óverðtryggðu vextina

Lengi vel buðu bankarnir uppá lægstu óverðtryggðu vextina á íbúðalánum en það hófst mikil sókn í óverðtryggð lán hjá þeim þegar meginvextir Seðlabankans lækkuðu umtalsvert árið 2020. Hlutdeild óverðtryggðra íbúðalána af heildaríbúðalánum hélt áfram að aukast í nóvember. Nú eru viðskiptabankarnir ekki lengur með lægstu óverðtryggðu vextina á íbúðalánum þar sem Gildi og Lífeyrissjóður Verslunarmanna eru nú með lægri vexti á óverðtryggðum íbúðalánum. Annað sem stóð upp úr á lánamarkaði var að óverðtryggð útlán lífeyrissjóðanna voru hærri en uppgreiðslur í fyrsta skipti í 18 mánuði.

Greiðslubyrði óverðtryggðra lána hækkað um 13,4 prósent frá því í vor

Greiðslubyrði á óverðtryggðum lánum frá bönkum eru nú 42.200 krónur á hverjum 10 milljónum króna sem teknar eru að láni miðað við lægstu vexti sem bjóðast á en meðan greiðslubyrði fór lægst í 37.300 í á fyrstu fimm mánuðum ársins í fyrra. Vextir eru þó enn frekar lágir og til samanburðar þá var greiðslubyrðin 53.900 krónur á hverjar 10 millj´num króna lánaðar fyrir þremur árum og 60.900 krónur fyrir fimm árum. Greiðslubyrði á verðtryggðu láni er 27.700 krónur á hverjar 10 milljónir króna lánaðar og hefur farið lækkandi því hún var 29.700 krónur í nóvember síðastliðnum og 35.000 krónur í nóvember 2019.