Árni Hrannar Haraldsson hefur verið ráðinn í starf framkvæmdastjóra Orku náttúrunnar og mun hann hefja störf þann 1. maí næstkomandi.
Í fréttatilkynningu frá Orku náttúrunnar kemur fram að Árni Hrannar búi yfir mikilli reynslu sem stjórnandi síðastliðin tuttugu ár, bæði hérlendis og erlendis.
Síðustu ár hefur Árni starfað sem framkvæmdastjóri aðfangakeðju MSPharma, sem er alþjóðlegt lyfjafyrirtæki með starfsemi víða um heim, en hann hefur verið búsettur í Sviss frá árinu 2011. Þá hefur hann einnig gegnt lykilhlutverkum hjá Actavis, 66°Norður og Xantis Pharma í Sviss.
„Árni Hrannar hefur mikla alþjóðlega reynslu sem yfirmaður í markaðsleiðandi lyfjafyrirtækjum. Þá hefur hann yfirgripsmikla og fjölbreytta þekkingu á öllum sviðum virðiskeðjunnar hvort sem það eru innkaup, rekstur, framleiðsla eða stýring á flóknum aðfangakeðjuferlum sem dæmi. Þetta eru allt hlutir sem munu nýtast okkar fyrirtæki vel auk þess sem metnaður og sýn Árna Hrannars fer vel saman við þá vegferð sem Orka náttúrunnar er á,“ er haft eftir Helgu Jónsdóttur stjórnarformanni ON.
„Ég hlakka til að leiða öfluga starfsemi Orku náttúrunnar og halda áfram uppbyggingu fyrirtækisins á Íslandi. Að vinna í góðum hópi fólks að ábyrgri nýtingu auðlinda Íslands samfélaginu til góða er að mínu mati mikil forréttindi,“ segir Árni Hrannar Haraldsson, nýráðinn framkvæmdastjóri ON.
