Forstjóri Kviku banka segir að bankinn brjóti samkeppnislög ef hann reynir að reyna að hafa áhrif á rekstur og sjóðastýringu GAMMA.

VR hefur hótað að taka allt sitt fé úr eignastýringu hjá Kviku, 4,2 milljarða króna, ef ekki verður innan fjögurra daga brugðist við meintum hótunum Almenna leigufélagsins, sem er í eigu sjóða í stýringu GAMMA, gagnvart leigjendum. 

Sjá einnig: Taka 4 milljarða úr Kviku láti þeir ekki af „grimmd­ar­­verk­um“

VR sagði varla hægt að lýsa framferði Almenna leigufélagsins með öðrum orðum en grimmd, taumlausri græðgi og mannvonsku.

Í samtali við Fréttablaðið minnir Ármann Þorvaldsson, forstjóri Kviku banka, á það að Samkeppniseftirlitið hafi enn ekki heimilað kaup Kviku á GAMMA. 

„Við erum því ekki eigendur félagsins. Við vonumst auðvitað eftir því að kaupin gangi í gegn en þangað til höfum við ekkert með stjórn GAMMA að gera og okkur óheimilt að hafa áhrif á rekstur og sjóðastýringu félagsins,“ segir Ármann. „Það væri brot á samkeppnislögum.“