Arion banki var með mestu hlutdeildina í miðlun hlutabréfa á Aðalmarkaði Kauphallarinnar á árinu 2020 eða 21,8 prósent. Næstur var Íslandsbanki með 18,2 prósent og þar næstir voru Fossar Markaðir með 16,8 prósent. Þetta kemur fram í tilkynningu frá Kauphöllinni.

Ef eingöngu er litið til hlutabréfaviðskipta sem eiga sér stað við pörun tilboða í tilboðabók (pöruð viðskipti) er Arion banki áfram með mestu hlutdeildina á árinu, eða 27 prósent, næstur kemur Kvika banki með 20,9 prósent og síðan Íslandsbanki með 19,6 prósent.

Mynd/Kauphöllin

Þegar litið er til kauphallarviðskipta sem samið er um utan tilboðabókar og tilkynnt til Kauphallar (tilkynnt viðskipti) eru Fossar Markaðir með mestu hlutdeildina á árinu 2020, eða 22,1 prósent. Næstur kemur Arion banki með 19,1 prósent og þar næstur er Íslandsbanki með 17,5 prósent hlutdeild.

Á First North markaðnum var Arion banki með mestu hlutdeildina, 42,2 prósent, á árinu 2020. Næstur var Kvika banki með 25,2 prósent og þarnæstir Arctica Finance með 21,2 prósent.

Íslandsbanki stærstu í skuldabréfum

Íslandsbanki var með mestu hlutadeildina á skuldabréfamarkaði eða tæp 19 prósent á árinu 2020. Næstir komu Kvika banki með 18,9 prósent og Arion banki með 16,1 prósent.

Þegar litið er til paraðra skuldabréfaviðskipta er Kvika banki með mestu hlutdeildina á árinu 2020, eða 27,1 prósent. Næstur í röðinni var Arion banki með 22 prósent og þar næstur var Íslandsbanki með 21,1 prósent hlutdeild í pöruðum skuldabréfaviðskiptum.

Í tilkynntum skuldabréfaviðskiptum voru Fossar Markaðir með mestu hlutdeildina á árinu 2020, eða 21,6 prósent. Næstir koma Íslenskir fjárfestar með 19,9 prósent og þar næstir koma Íslandsbanki með 16,8 prósent hlutdeild.