Arion banki hefur eignast allt hlutafé í TravelCo hf. og hyggst finna félaginu nýja framtíðareigendur svo fljótt sem auðið er. Þetta kemur fram í tilkynningu sem Arion banki sendi frá sér í dag.

„Það eru vissulega tímamót, bæði fyrir mig persónulega og félagið, nú þegar nýir aðilar taka við því. Mér er efst í huga þakklæti til alls þess frábæra starfsfólks sem ég hef starfað með og hefur tekið þátt í uppbyggingu félagsins á undanförnum árum,“ segir Andri Már Ingólfsson, stofnandi TravelCo.

„TravelCo er eitt öflugasta fyrirtæki Norðurlanda á sviði ferðaþjónustu og ég óska félaginu og starfsfólki þess alls hins besta í framtíðinni sem ég veit að verður björt.“

TravelCo hf var stofnað í kjölfar falls Primera Air og rekur ferðaskrifstofur á Íslandi, í Danmörku, Svíþjóð, Noregi og Finnlandi. Í kjölfar lokunar Primera Air töpuðu ferðaskrifstofur Primera Travel Group háum fjárhæðum vegna fluga sem greidd höfðu verið til flugfélagsins en ekki verið flogin.

Aðeins sé um að ræða breytingu á eignarhaldi og mun dagleg starfsemi og þjónusta ferðaskrifstofanna haldast óbreytt að því er fram kemur í tilkynningunni. Markmið Arion banka sé að tryggja áframhaldandi starfsemi ferðaskrifstofanna og hagsmuni bankans.

Starfsemi TravelCo á Íslandi hefur farið fram undir merkjum ferðaskrifstofanna Heimsferða og Terra Nova.

TravelCo hf var stofnað í kjölfar falls Primera Air
Hörður Sveinsson