Síminn og Ardian France hafa náð samkomulagi um breytingar á kaupsamningi um kaup og sölu 100% hlutafjár í Mílu Ehf. Þetta kemur fram í tilkynningu frá Símanum en helsta breytingu á ákvæðum kaupsamnings er lækkun á heildarvirði viðskiptanna (e. enterprise value).

Var það áður 78 milljarðar króna, að meðtöldum fjárhagslegum skuldbindingum sem kaupandinn yfirtekur, en fyrirtækin hafa nú náð samkomulagi um að heildarvirði viðskiptanna skuli vera 73 milljarðar króna sem er lækkun um 5 milljarða króna.

Samkvæmt breyttum kaupsamningi fær Síminn greitt á efndadegi um 35 milljarða króna í reiðufé og 19 milljarðar króna verða lánaðir í formi skuldabréfs sem Síminn veitir kaupanda til þriggja ára. Skuldabréfið var áður 15 milljarðar króna eins og fram kom í tilkynningu Símans.

Skuldabréfið er framseljanlegt og ber 4% vexti sem er óbreytt frá fyrra samkomulagi. Leiða þessar breytingar á kaupsamningnum til þess að áætlaður söluhagnaður er 41,8 milljarðar króna, að teknu tilliti til kostnaðar vegna viðskiptanna, sem er lækkun um 4,6 milljarða króna frá því sem tilkynnt var þann 23. október 2021.

Kaupsamningurinn m.t.t. framangreindra breytinga er háður þeim fyrirvara að tillögur Ardian gagnvart Samkeppniseftirlitinu séu fullnægjandi og að ekki þurfi að koma til frekari íþyngjandi skilyrða og/eða breytinga til að mæta kröfum Samkeppniseftirlitsins.