Alvotech tilkynnti í dag um samning við Advanz Pharma, um markaðssetningu AVT23, fyrirhugaðrar líftæknilyfjahliðstæðu við Xolair (e. omalizumab). Samningurinn nær til Evrópska efnahagssvæðisins, Bretlands, Sviss, Kanada, Ástralíu og Nýja Sjálands.
Omalizumab er einstofna mótefni sem binst við IgE og er notað til meðferðar við ofnæmisastma og langvinnri nef- og skútabólgu með sepageri í nefi. Lyfið er í þróun og hefur ekki hlotið markaðsleyfi.
„Við hlökkum til að vinna með Advanz Pharma að markaðssetningu á þessu mikilvæga meðferðarúrræði við sjúkdómum í öndunarvegi. Þessi samningur er til marks um þá áherslu sem bæði fyrirtækin leggja á að bæta aðgengi sjúklinga að hagkvæmari líftæknilyfjum um allan heim,“ segir Anil Okay, framkvæmdastjóri viðskiptasviðs Alvotech.
Samkvæmt samningnum mun Alvotech sjá um þróun og framleiðslu en Advanz Pharma sér um skráningu og markaðssetningu lyfjanna. Heildarsala á frumlyfinu á þeim markaðssvæðum sem samningurinn nær til er um 140 milljarðar íslenskra króna á ári samkvæmt upplýsingum frá IQVIA.
