Alvotech (NASDAQ og First North Growth „ALVO“) tilkynnti í dag um fjölgun í stjórn fyrirtækisins, í tengslum við skráningu fyrirtækisins á hlutabréfamarkað. Þetta kemur fram í fréttatilkynningu.

Lisa Graver, Árni Harðarson, Linda McGoldrick og Ann Merchant tóku ný sæti í stjórn, en Róbert Wessman, stofnandi og stjórnarformaður, Richard Davies, Tomas Ekman og Faysal Kalmoua sitja áfram. Ann, Lisa og Richard eru óháðir stjórnarmenn.

„Það er mér sönn ánægja að bjóða nýja fulltrúa velkomna í stjórn fyrirtækisins á þessum merku tímamótun í þróun þess,“ sagði Róbert Wessmann, stofnandi og stjórnarformaður Alvotech.

„Vísindaleg þekking, reynsla af rekstri og innsæi í fjármálamarkaði verður mikilvægt veganesti á vegferð fyrirtækisins sem er að auka sjálfbærni heilbrigðisþjónustu með bættu aðgengi að líftæknilyfjum.“

Róbert Wessman stofnaði Alvotech árið 2013 og hefur verið stjórnarformaður síðan 2019. Hann er jafnframt stjórnarformaður Alvogen og Lotus Pharmaceuticals og situr í stjórn Fuji Pharma Co. Ltd. Róbert var forstjóri Actavis og leiddi breytingu þess í alþjóðlegt samheitalyfjafyrirtæki. Hann stofnaði jafnframt Alvogen og leiddi breytingu þess í alþjóðlegt samheitalyfjafyrirtæki, auk þess sem hann gegndi stöðu forstjóra og stjórnarformanns. Hann er einn af eigendum Aztiq Group („Aztiq“). Róbert útskrifaðist með cand. oecon. gráðu í viðskiptafræði frá Háskóla Íslands.

Richard Davis er varaformaður stjórnar Alvotech og formaður starfskjaranefndar. Hann er forstjóri Auregen Bio Therapeutics, var áður forstjóri Bonesupport, yfirmaður viðskipta hjá Hospira og gegndi ýmsum stöðum í framkvæmdastjórn Amgen. Richard útskrifaðist með BS gráðu í efnafræði frá Háskólanum í Portsmouth og með MBA gráðu frá Warwick háskóla.

Linda McGoldrick er formaður endurskoðunarnefndar. Hún hefur gengt ýmsum stjórnunarstöðum og setið í stjórnum alþjóðlegra fyrirtækja á sviði heilbrigðis- og lífvísinda. Þar á meðal eru Marsh-MMC Companies, Veos, Kaiser Permanente, Compass Pathways og Zillion. Hún stofnaði og gegnir stöðu stjórnarformanns og forstjóra Financial Health Associates International og er forstjóri 2EnableHealth. Linda var árið 2012 útnefnd einn af 100 hæfustu stjórnarmönnum á sviði starfskjaramála í stærstu fyrirtækjum heims af dagblaðinu Financial Times. Hún útskrifaðist með MSW próf í heilsugæslufræðum frá Háskólanum í Pennsylvaníu og MBA gráðu frá Wharton skólanum.

Thomas Ekman hefur setið í stjórn Alvotech frá árinu 2019. Hann er einn af meðeigendum CVC Capital Partners og hluti af framkvæmdastjórn CVC á Norðurlöndum. Thomas var áður einn af eigendum og framkvæmdastjóri ráðgjafafyrirtækisins 3i Group. Hann er með MS gráðu frá Háskólanum í Strathclyde og Chalmers tækniháskólanum, auk MBA gráðu frá IMD í Sviss.

Lisa Graver hefur gengt ýmsum stjórnunarstörfum við Alvogen frá árinu 2010 og hefur verið forstjóri Alvogen U.S. frá 2015. Áður en hún gekk til liðs við Alvogen var Lisa yfirmaður einkaleyfismála hjá Actavis. Hún er með BS gráðu í líffræði frá Lakehead háskóla og Juris Doctor í lögfræði frá lagadeild Case Western háskólans.

Árni Harðarson er einn af eigendum Aztiq. Hann gegndi áður stöðu aðstoðarforstjóra og yfirlögfræðings Alvogen og var einn af stjórnendum fyrirtækisins frá árinu 2009. Áður en Árni gekk til liðs við Aztiq og Alvogen var hann yfirmaður skattamála hjá Actavis og yfirmaður skatta- og lögfræðiþjónustu Deloitte. Árni útskrifaðist sem lögfræðingur frá Háskóla Íslands.

Faysal Kalmoua hefur setið í stjórn Alvotech síðan 2020 og er einn af eigendum Aztiq. Hann hefur síðust ár gengt ýmsum lykilstöðum hjá Alvogen Iceland ehf. og Alvogen Inc. Þá var hann einn af framkvæmdastjórum Synthon. Hann er með meistarapróf í efnafræði frá Radboud háskólanum í Nijmegen og MBA gráðu frá Insead.

Ann Merchant hefur setið í framkvæmdastjórn MorphoSys frá árinu 2018, og gengt stöðu yfirmanns aðfangakeðju frá árinu 2019. Áður en hún gekk til liðs við MorphoSys var Ann æðsti stjórnandi Schreiner Medpharm og gegndi ýmsum stöðum í framkvæmdastjórn Amgen, þar á meðal sem yfirmaður aðfangakeðju. Ann útskrifaðist með MBA gráðu frá viðskiptadeild Henley háskóla og BS gráðu í tungumálum frá Georgetown háskólanum.

Hlutabréf Alvotech voru skráð á Nasdaq markaðinn í New York 16. júní s.l. Þá var fyrirtækið einnig skráð á Nasdaq First North Growth markaðinn á Íslandi 23. júní s.l. og varð þar með fyrsta íslenska fyrirtækið skráð jafnhliða á Íslandi og í Bandaríkjunum.

Frá því að Alvotech var stofnað fyrir áratug hefur fyrirtækið byggt upp fullkomna aðstöðu til þróunar og framleiðslu á líftæknihliðstæðulyfjum á stórum skala, en þau bjóða upp á sömu klínísku virkni og líftæknilyf sem verða sífellt mikilvægari í meðferð við ýmsum sjúkdómum. Líftæknihliðstæðulyf eru ódýrari en upprunalega líftæknilyfið. Alvotech leitast við að verða í forystu á sviði líftæknihliðstæðulyfja og hefur byggt upp alhliða getu til rannsókna og þróunar. Allir þættir framleiðslunnar eru í höndum fyrirtækisins til að tryggja gæði og lægri tilkostnað.