Takk dagur Fossa fjárfestingarbanka fer fram í áttunda sinn í dag. Á Takk daginn renna allar þóknanatekjur bankans ásamt beinum framlögum frá viðskiptavinum til góðs málefnis.

„Þessi viðburður hefur vaxið í gegnum árin og er tilhlökkunarefni í hvert sinn. Við fögnum tækifærinu til að geta, í samstarfi við viðskiptavini og samstarfsaðila, staldrað við og þakkað fyrir það sem vel er gert,“ segir Haraldur Þórðarson, forstjóri Fossa fjárfestingarbanka, í tilkynningu en þar kemur fram að eins og áður hafi starfsfólk Fossa fjárfestingarbanka valið málefni sem stutt er með söfnun Takk dagsins.

„ Að þessu sinni rennur afrakstur dagsins til þess góða starfs sem unnið er á vettvangi Píeta samtakanna, en þau sinna mikilvægu forvarnarstarfi gegn sjálfsvígum og sjálfsskaða og styðja við aðstandendur í slíkum aðstæðum,“ segir Haraldur og kveðjur mikinn einhug hafa verið meðal starfsmanna um valið.

„Píeta samtökin eru að stærstum hluta rekin fyrir frjáls framlög og ánægjulegt að geta stutt við þau með veglegum hætti. Starfsemin er umfangsmikil og þjónusta veitt allan sólarhringinn. Þarna er unnið mikilvægt og þakkarvert starf.“

Auk Fossa taka Kauphöllin (Nasdaq Iceland) og uppgjörsfyrirtækið T Plús þátt í Takk deginum með því að fella niður öll gjöld af viðskiptum Fossa innan dagsins og renna þau í staðinn til söfnunarinnar. Þá gefur auglýsingastofan TVIST vinnu sína sem tengist deginum.

Allt frá upphafi hefur verið mikil ánægja með framtakið og vöxtur í söfnuninni. Á síðasta ári söfnuðust 21,6 milljónir króna sem runnu til Jafningjaseturs Reykjadals og árið áður söfnuðust 12,6 milljónir til handa Geðhjálp.