Alicja Lei, sem hefur starfað sem vörumerkjastjóri Travelade, hefur verið ráðin í markaðsdeild Meniga, eftir því sem fram kemur í tilkynningu frá hugbúnaðarfyrirtækinu. Þar segir að hún muni styrkja fyrirtækið í þeim fjölmörgu erlendu verkefnum sem framundan séu.

Alicja er fædd og uppalin í Kanada en hefur lært og starfað í Bandaríkjunum, Englandi og á Íslandi síðastliðin þrjú ár. Hún vann í markaðsdeild útivistarmerkisins Helly Hansen um nokkurt skeið en eftir að hafa flutt til Íslands hefur hún starfað sem vörumerkjastjóri fyrirtækisins Travelade.

Alicja er gift Arnþóri Heimissyni, fjármálastjóra hjá Röfnum, en hann á eina dóttur.

Meniga var stofnað árið 2009 og eru starfsmenn fyrirtækisins rúmlega 150 talsins. Hugbúnaður Meniga hefur verið innleiddur hjá yfir 160 fjármálastofnunum og er hann aðgengilegur yfir níutíu milljónum einstaklinga í þrjátíu löndum. Fyrirtækið er með skrifstofur í Kópavogi, London, Stokkhólmi, Varsjá, Barcelona og Singapore.