Fasteignamarkaðurinn er í algerri kyrrstöðu á höfuðborgarsvæðinu og það mun ekki breytast á næstu mánuðum ef marka má hagsjá Landsbankans. Í henni kemur fram að fasteignaverð á svæðinu hafi aðeins hækkað um 0,2% milli maí og júní. Verð á fjölbýli hækkaði um 0,3% og verð á sérbýli lækkaði um 0,5%.

Þegar horft er yfir 12 mánaða tímabil má þá sjá að verð á fjölbýli hefur hækkað um 3,4% en verð á sérbýli um 1,8%. Vegin árshækkun húsnæðisverðs nemur nú 3,4% sem er 0,4 prósentustiga lækkun frá fyrri mánuði.

Viðskipti með fjölbýli skipta mestu

Við mælingar á þróun fasteignaverðs á höfuðborgarsvæðinu skipta viðskipti með fjölbýli langmestu, en þau voru um 82% allra viðskipta með íbúðarhúsnæði á árinu 2018. Síðustu sex mánuði hefur verð á fjölbýli hækkað um 1% en verðhækkun í febrúar skiptir þar mestu.

Samsvarandi tala fyrir árið 2018 var 1,9% en fyrir árið 2017 var hún 11,9%. Þessar tölur eru enn ein birtingarmynd þessarar kyrrstöðu.

Raunverð stöðugt og lítil viðskipti

Vísitala neysluverðs án húsnæðis hækkaði um 0,37% milli mánaða í júní og 3% á einu ári sem er nokkuð minna en fasteignaverð á sömu 12 mánuðum. Raunverð fasteigna breytist því lítið milli mánaða, nema hvað raunverð sérbýlis hefur gefið nokkuð eftir. Horft yfir lengra tímabil hefur hækkun fasteignaverðs síðustu mánuði náð að halda í við þróun verðbólgunnar án húsnæðiskostnaðar og því hefur raunverð íbúðarhúsnæðis verið nokkuð stöðugt.

Hæst fór raunverðið í október 2007 fyrir hrun en lækkaði svo mikið. Það náði svo aftur sama stigi í apríl 2017 og hefur síðan hækkað um tæp 10%. Árshækkun þess er þó orðin hóflegri en áður en raunverð fasteigna í júní var um 0,2% hærra en á sama tíma í fyrra. Síðustu 12 mánuði er hækkunin mun minni en árin tvö þar á undan. Hækkunin nam 4,1% fyrir júní 2018 og 25% fyrir júní 2017.

Viðskipti með íbúðarhúsnæði voru þá mun minni í júní en verið hefur lengi, að undanskildum desember á síðasta ári. Fjöldi viðskipta fyrstu sex mánuði ársins var um 4% minni en á sama tíma í fyrra og viðskiptin í júní í ár voru um 23% minni en í júní 2018. Því má segja að fasteignamarkaðurinn hafi gefið töluvert eftir hvað viðskipti varðar. Fyrstu sex mánuði ársins var meðalfjöldi viðskipta hins vegar 6% minni en var á öllu árinu 2018.

Þá segir í hagsjánni að veðrið á höfuðborgarsvæðinu hafi verið óvenju gott í júní sem kunni að hafa þau áhrif að viðskipti með fasteignir voru óvenju lítil. Óvissa í efnahagslífinu vegna kjarasamninga og áfallsins sem hagkerfið varð fyrir þegar WOW air varð gjaldþrota spili þá inn í líka. Framboð íbúða á markaði hefur aukist og einnig má vænta mikillar aukningar á framboði leiguhúsnæðis. Því má gera ráð fyrir frekari biðstöðu á markaðinum á næstunni.