Það var aldrei ætlunin að ríkið héldi á hlut sínum í Íslandsbanka til lengri tíma. Þetta segir Sigurður Hannesson, framkvæmdastjóri Samtaka iðnaðarins, í viðtali við Þjóðmál sem kom út í morgun. Hann var í framkvæmdahóp um losun fjármagnshafta. Vinna hópsins leiddi til þess að ríkið eignaðist Íslandsbanka sem hluta af stöðug­leikafram­lagi Glitn­is.

Ríkið, sem á Íslandsbanka að fullu, vinnur að því að selja hluta af bankanum með opnu hlutafjárútboði. Að því loknu verður bankinn skráður í Kauphöll.

„Þegar ríkið eignaðist þann hlut var það til að leysa ákveðin vandamál sem tengdust losun hafta. Það var engin stefna af hálfu ríkisins að eignast banka í viðskiptalegum tilgangi eða auka hlut sinn á fjármálamarkaði. Þvert á móti var lögð áhersla á að Glitnir ætti áfram hlutinn og kröfuhafar kæmu honum í verð,“ segir hann.

Gögn sem birtust í tengslum við kynningarfundinn 8. júní 2015 þegar áætlun um losun hafta var kynnt sýna þetta en svo breyttist staðan þegar leið á árið.

Sigurður segir að eftirlit með fjármálafyrirtækjum sé nú „miklu meira“ en það hafi verið í aðdraganda bankahrunsins 2008. Jafnframt hafi sameining Seðlabanka og Fjármálaeftirlitsins hefur styrkt eftirlit til muna. Gerðar séu ríkari kröfur til stjórnenda og eigenda fjármálastofnana en áður var, bankar séu mun betur fjármagnaðir en áður og eiginfjárhlutfall þeirra mun hærra.

„Þetta er gjörbreytt landslag. Ríkið þarf því ekki að vera eigandi eignarhlutar til að hafa áhrif á markaðinn, það gerir það bæði í gegnum regluverkið og eftirlit. Mér finnst það skipta miklu máli í þessari umræðu,“ segir hann við Þjóðmál.