Íslensk stjórnvöld mótmæltu tillögunni um að landið yrði sett á gráan lista FATF á fundi aðildrarríkjanna sem nýlega er afstaðinn. Afstaðan mætti skilningi meðal nokkurs fjölda aðildarríkja. Vænta íslensk stjórnvöld þess að FATF nýti fyrsta tækifæri til að endurskoða mat á stöðu Íslands.

Þetta kemur fram í fréttatilkynningu á vef Stjórnarráðsins. Þar segir að á fundi FATF, alþjóðlegs fjármálaaðgerðahóps ríkja um aðgerðir gegn peningaþvætti og fjármögnun hryðjuverka, hafi ákveðið að setja Ísland á lista yfir ríki sem eru samvinnufús en aðgerðaáætlun um endurbætur er í farvegi.

Á fundinum mótmæltu íslensk stjórnvöld áðurnefndri tillögu þar sem þau telja að niðurstaðan „endurspegli á engan hátt stöðu landsins í vörnum gegn peningaþvætti og fjármögnun hryðjuverka. Sú afstaða mætti skilningi meðal nokkurs fjölda aðildarríkja.“

Fréttablaðið greindi frá því fyrr í vikunni að Ísland nyti fulls stuðnings Evrópusambandsins á fundinum og flestra ríkja þess. Bandaríkin og Bretland væru hins vegar í hópi þjóða sem vilja að Ísland verði sett á listann.

Niðurstaðan byggist á stöðuskýrslu sérfræðingahóps FATF sem lá fyrir 24. september sl. Á fundinum var horft til vilja íslenskra stjórnvalda til að vinna áfram að úrbótum. Þá var viðurkennt að Ísland hafi gripið til aðgerða til að mæta kröfum FATF en ekki hafi gefist tími til að yfirfara þær áður en ákvörðun var tekin. Því varð niðurstaðan sú að Ísland mundi áfram sæta eftirliti vegna eftirfarandi þriggja aðgerða sem FATF telur enn standa út af.

„Stjórnvöld hafa ásamt erlendum ráðgjöfum lagt mat á möguleg áhrif af því að Ísland lendi á listanum. Það er samdóma álit þeirra að áhrifin verði óveruleg og er hvorki talið að niðurstaða FATF hafi bein áhrif á almenning né fjármálastöðugleika á Íslandi,“ segir í tilkynningunni.

„Erlendir aðilar í viðskiptum við íslensk fyrirtæki, þá einkum fjármálafyrirtæki og tryggingafélög, gætu þurft að kanna sjálfstætt hvort varnir gegn peningaþvætti og fjármögnun hryðjuverka séu nægilega tryggar.“