Afkoma Arion banka á öðrum ársfjórðungi var umtalsvert umfram fyrirliggjandi spár greiningaraðila, að því er segir í tilkynningu til Kauphallarinnar.

Bankinn hagnaðist um 7,8 milljarða króna á ársfjórðungnum, samkvæmt drögum að uppgjöri, og reiknuð arðsemi á ársgrundvelli var ríflega 16 prósent.

Rekstrartekjur fjórðungsins námu um 15 milljörðum króna, þar af voru tekjur af kjarnastarfsemi (hreinar vaxtatekjur, hreinar þóknanatekjur og hreinar tekjur af tryggingastarfsemi) um tólf milljarðar króna og hækkuðu um 10,5 prósent frá öðrum ársfjórðungi 2020. Rekstrarkostnaður fjórðungsins nam ríflega sex milljörðum króna.

Stærsta breytingin milli ára liggur í virðisbreytingu útlána sem var jákvæð um 0,8 milljarða króna á öðrum ársfjórðungi 2021 en á sama tíma fyrir ári var virðisbreyting neikvæð um 0,9 milljarða króna og tengdist að mestu þeirri óvissu sem uppi var vegna COVID-19 faraldursins. Hreinar þóknanatekjur á öðrum ársfjórðungi 2021 námu 3,6 milljörðum króna, samanborið við 2,7 milljarða króna á sama tíma í fyrra.

Tekjuskattshlutfall fjórðungsins er 16 prósent og afkoma af eignum til sölu er óveruleg. Í samræmi við alþjóðlega reikningsskilastaðla er samningur um sölu á Valitor fyrir 12,3 milljarða króna, sem tilkynnt var um 1. júlí síðastliðinn, ekki færður til bókar á öðrum ársfjórðungi.

Uppgjörið og kynningarefni fyrir annan ársfjórðung 2021 er enn í vinnslu og könnunarvinnu endurskoðenda er ekki lokið. Því kann það að taka breytingum fram að birtingardegi þann 28. júlí næstkomandi.