Veitingastað Eldsmiðjunnar á Laugarvegi hefur verið lokað og staðnum á Bragagötu hefur verið lokað tímabundið. Staðurinn á Suðurlandsbraut er því eini staðurinn sem enn er í fullum rekstri. Eldsmiðjunni á Dalvegi í Kópavogi var lokað fyrr á þessu ári.

Eldsmiðjan er í eigu Gleðipinna hf.

Jóhann Örn Þórarinsson, einn eiganda Gleðipinna segir ástæðuna fyrir lokun staðanna í miðbæ Reykjavíkur mega rekja til þess ástands sem skapast hefur vegna COVID-19.

„Þetta eru staðir sem voru báðir að fá mikið af ferðamönnum og lifðu að miklu leyti á ferðaþjónustunni. Við erum að meta stöðuna á Bragagötunni en vonumst til að geta opnað aftur þegar við sjáum erlenda ferðamenn koma aftur til landsins. Staðnum á Laugarvegi hefur verið lokað, nýr aðili er tekinn við húsnæðinu og hann er búinn að opna annan stað," segir Jóhann Örn í samtali við Fréttablaðið.

Hann segir að staðurinn á Suðurlandsbraut sé enn í fullum rekstri og verði það áfram.

Eigendur Eldsmiðjunnar, Saffran, Hamborgarafabrikkunnar, Keiluhallarinnar, og fleiri veitingastaða gengu í eina sæng í febrúar á þessu ári. Umræddir veitingastaðir, ásamt fleirum, voru áður reknir undir nafni Gleðipinna annars vegar og Foodco hins vegar.

Eldsmiðjan er einn elsti pítsastaður á landinu en hann var opnaður á Bragagötu árið 1986. Foodco tók við rekstri Eldsmiðjunnar árið 2007 og rak á tímabili fimm staði.