Aðalheiður Ósk Guðmundsdóttir hefur verið ráðin í starf framkvæmdastjóra Vök Baths á Egilsstöðum. Hún tekur við starfinu af Heiðu Vigfúsdóttur, sem gegnt hefur starfinu frá því að Vök opnaði sumarið 2019.

Aðalheiður er viðskiptafræðingur með M.Sc. gráðu frá Háskóla Íslands í nýsköpun og viðskiptaþróun og B.Sc. gráðu frá Háskólanum á Akureyri.

Áður starfaði Aðalheiður sem deildarstjóri ráðgjafar og þjónustu hjá Advania, vörustjóri á sölu- og markaðssviði hjá Reykjavík Excursions – Kynnisferðum og verkefnastjóri hjá Air Atlanta Icelandic. Þá hefur hún setið í stjórn Stjórnvísi frá 2017 og gengt þar formennsku frá 2019.

„Það er spennandi tækifæri en jafnframt krefjandi að taka við sem framkvæmdastjóri hjá Vök Baths. Mér finnst mjög gaman að takast á við nýjar áskoranir og leggja mitt af mörkum. Ég hlakka til að flytja til Egilsstaða og taka virkan þátt í samfélaginu og auka verðmætasköpun á svæðinu,“ segir Aðalheiður í tilkynningunni frá Vök Baths.

Aðalheiður var valin úr stórum hópi umsækjenda en alls sóttu 100 manns um starfið þegar það var auglýst í haust.

„Stjórnin er ánægð með ráðninguna enda býr Aðalheiður yfir mikilli reynslu í rekstri, markaðsmálum og þjónustu við viðskiptavini. Auk þess hafi hún mikinn áhuga og þekkingu á ferðaþjónustu og þá sérstaklega upplifunarhönnun fyrir ferðamenn," segir Birnir Gíslason, stjórnarformaður í tilkynningunni.