Samkvæmt nýrri þjóðhagsspá Hagstofu Íslands er útlit fyrir mesta samdrátt á lýðveldistímanum.

Spáin gerir ráð fyrir að verg landsframleiðsla dragist saman um 8,4 prósent í ár. Spáin tekur til áranna 2020 til 2025.

Slæmar horfur í ár má rekja til kórónaveirufaraldursins sem hefur meðal annars lamað samgöngur á milli landa og þar af leiðandi haft mikil áhrif á ferðaþjónustu á Íslandi.

Snarpur viðsnúningur árið 2021

Reiknað er með snörpum viðsnúningi á næsta ári og að vöxtur landsframleiðslunnar verði 4,9 prósent.

Næstu ár er gert ráð fyrir hagvexti á bilinu 2,5 prósent til 2,9 prósent.

Horfur eru á að þjóðarútgjöld dragist saman um 4,4 prósent í ár en að þau aukist um 4,3 prósent á næsta ári.

Gert er ráð fyrir að einkaneysla dragist saman um 6,1 prósent í ár og að atvinnuleysi verði að jafnaði 8,2 prósent.

Árið 2021 er spáð 5,5 prósent aukningu einkaneyslu og að atvinnuleysi verði komið niður í 6,8 prósent.

Útlit er fyrir að útflutningur dragist saman um rúm 30 prósent í ár en búist er við bata á næsta ári og rúmlega 19 prósent vexti.