Heildarfjöldi farþega hjá Icelandair var 73.200 í júlímánuði samanborið við 18.500 í júnímánuði. Farþegaflug jókst mikið eftir að ferðatakmörkunum í Evrópu var aflétt um miðjan júnímánuð.

Í tilkynningu sem Icelandair sendi frá sér í dag kemur fram að COVID-19 faraldurinn hafi þó áfram mikil áhrif á starfsemi félagsins. Fraktflutningar drógust mun minna saman en farþegaflug á tímabilinu.

Þó að farþegaflutningar hafi tekið við sér í júlímánuði voru þeir aðeins brot af því sem þeir voru í sama mánuði í fyrra. Dróst fjöldi farþega saman um 87 prósent.

„Tengiflug milli Evrópu og Norður Ameríku var í algjöru lágmarki í júlí vegna ferðatakmarkana í Bandaríkjunum og á ytri landamærum Schengen. Fjöldi farþega til Íslands var um 58.200 í júlí og um 13.300 frá Íslandi. Heildarframboð minnkaði um 89% á milli ára. Fjöldi farþega hjá Air Iceland Connect var tæplega 15 þúsund í júlímánuði og fækkaði um 48% á milli ára. Framboð í innanlandsflugi minnkaði um 64%,“ segir í tilkynningunni.

Þá segir Icelandair að seldir blokktímar í leiguflugstarfsemi félagsins hafi dregist saman um 81% á milli ára í júlí en hafa dregist saman um tæp 40% á milli ára það sem af er ári. Flutningastarfsemi félagsins gekk samkvæmt áætlun í júlímánuði og drógust fraktflutningar mun minna saman en farþegaflug, eða um 15% á milli ára. Samdrætti í farþegaflugi hefur á liðnum mánuðum verið mætt með auknum ferðum fraktvéla félagsins, bæði til Bandaríkjanna og Evrópu.

Bogi Nils Bogason, forstjóri Icelandair Group, segir að félagið hafi lagt höfuðáherslu á að viðhalda sveigjanleika til að takast á við áframhaldandi óvissu og geta brugðist hratt við breytingum á mörkuðum í því ástandi sem nú ríkir.

„Við erum stöðugt að meta stöðuna í takt við aðstæður, bæði hvað varðar þróun eftirspurnar og breytingar á ferðatakmörkunum, með það að markmiði að mæta eftirspurn á hverjum tíma og tryggja öruggar flugsamgöngur til og frá landinu nú og til frambúðar,“ segir Bogi.