Alls söfnuðust 21,6 milljónir króna fyrir Jafningjasetur Reykjadals á Takk degi Fossa í gær, að því er fram kemur í tölvupósti til viðskiptavina og fleiri. Um er að ræða félagsmiðstöð fyrir börn og ungmenni með fötlun eða sérþarfir þar sem þau hafa tækifæri til að skemmta sér með jafningjum við frístunda- og tómstundastörf. Einu sinni á ári renna allar þóknanatekjur Fossa markaða til góðs málefnis.

Á Takk daginn í ár runnu allar þóknanatekjur Fossa til þess að koma varanlegu húsnæði yfir nýhafna starfsemi Jafningjaseturs Reykjadals. „Jafningjasetrið hóf starfsemi í Hafnarfirði í haust og var gríðarvel tekið,“ sagði Haraldur Þórðarson, forstjóri Fossa markaða í viðtali við Markaðinn á miðvikdaginn.

Um er að ræða félagsmiðstöð fyrir börn og ungmenni með fötlun eða sérþarfir þar sem þau hafa tækifæri til að skemmta sér með jafningjum við frístunda- og tómstundastörf. „Starfsemin fer nú fram í tímabundnu húsnæði og ánægjulegt að styðja við að hún fái varanlegan samastað,“ sagði hann.

„Við erum í skýjunum yfir þessu stórkostlega framlagi sem til stuðnings við nýhafinni starfsemi Jafningjaseturs Reykjadals. Við fórum af stað í október í tímabundnu húsnæði í Menntasetrinu við Lækinn í Hafnarfirði, en viðtökurnar og þátttakan verið slík að strax varð ljóst að finna þyrfti Jafningjasetrinu varanlegt húsnæði við hæfi. Með þessum styrk er hægt að setja fullan kraft í þá vinnu,“ segir Margrét Vala Marteinsdóttir, forstöðukona Reykjadals, í tilkynningu. „Það hefur verið afskaplega ánægjulegt að sjá góðar viðtökur við Jafningjasetrinu þar sem börn og ungmenni með fötlun eða sérþarfir hafa með stuðningi getað notið félagslífs og samveru líkt og önnur börn. Við hlökkum mjög til þess að sjá þessa starfsemi dafna áfram.“

Bein framlög bættust við

„Viðskiptavinir Fossa gerðu okkur mögulegt að afhenda Jafningjasetri Reykjadals þennan styrk, en þátttakan í ár sló öll fyrri met. Þar vega líka þungt bein framlög inn á reikning söfnunarinnar,“ segir Haraldur í tilkynningunni.

Líkt og áður er það starfsfólk Fossa sem velur það málefni sem fær styrk Takk dagsins og segir Haraldur mikla ánægju með valið nú. „Öll erum við félagsverur og öll samskipti og samvera skipta miklu í lífi fólks. Aðgerðir vegna Covid-19 gera fólki þetta enn ljósara og því er afar ánægjulegt að geta stuðlað að því að mikilvæg starfsemi Jafningjaseturs Reykjadals fái varanlegt húsnæði þar sem viðkvæmur hópur fær stuðning til félagslífs og jákvæðra samskipta,“ segir Haraldur.

Takk dagur Fossa markaða var í ár haldinn í sjöunda sinn, en þennan daga renna allar þóknanatekjur vegna viðskipta dagsins til góðs málefnis. Auk Fossa markaða taka Kauphöllin (Nasdaq Iceland) og uppgjörsfyrirtækið T Plús þátt í deginum með því að fella niður öll gjöld af viðskiptum Fossa innan dagsins og renna þau í staðinn til söfnunarinnar. Þá gefur auglýsingastofan TVIST vinnu sína sem tengist deginum.