1912, móðurfélag heildsölunnar Nathan & Olsen og Ekrunnar, hefur keypt 56 prósent hlut í Emmessís. Ísgarðar, félag í eigu Pálma Jónssonar, framkvæmdastjóra ísgerðarinnar, seldi hlutinn en hann heldur eftir 35 prósenta hlut. Samkeppniseftirlitið á eftir að blessa kaupin. Þetta herma heimildir Fréttablaðsins.

1912 er í eigu Kristínar Fenger Vermundsdóttur og barna hennar, Ara Fenger forstjóra og Bjargar Fenger.­ Árið 2017 velti samstæðan sjö milljörðum króna og hagnaðist um 217 milljónir króna.

Tækifærin í samlegð felast bæði í stoðþjónustu og dreifingu.

Stjórnendur 1912 horfa til þess að Emmessís sé öflugt vörumerki með góðar vörur. Þeir sjá einnig mikil tækifæri í samlegð innan samstæðunnar. Tækifærin í samlegð felast bæði í stoðþjónustu og dreifingu, að því er heimildir herma.

Emmessís dreifir til að mynda frystivörurm í verslanir en það gerir Nathan & Olsen einnig. Það bjóði upp á ýmsa möguleika í samstarfi.

Nathan & Olsen flytur einungis inn ís frá Häagen-Dazs. Heildsalan er því ekki umsvifamikil í sölu á ís og því er talið ólíklegt að Samkeppniseftirlitið muni skerast í leikinn.

Kjörís flytur inn ís frá umboði sem Nathan & Olsen er með

Þeir sem þekkja vel til á heildsölumarkaði vekja athygli á að Nathan & Olsen hafi umboð fyrir Unilever en keppinauturinn Kjörís flytji inn ís fá fyrirtækinu, þar á meðal ísinn Magnum. Leiða megi líkur að því að stjórnendur 1912 muni reyna að fá umboð til að selja ísinn hér á landi. Uni­lever framleiðir til að mynda Dove, Knorr og Cif.

Pálmi keypti í Emmessís fyrir tveimur mánuðum

Athygli vekur að Pálmi keypti 89 prósenta hlut í Emmessís í lok apríl af hópi fjárfesta sem leiddur var af Einari Erni Jónssyni. Um tveimur mánuðum síðar selur hann 56 prósenta hlut til 1912. Faðir Einars Arnar stofnaði Nóatún en afi Pálma stofnaði Hagkaup. Félag á vegum Gyðu Dan Johansen, sem fjárfesti í ísgerðinni á sama tíma og Einar Örn, mun áfram eiga níu prósenta hlut í Emmessís.

Emmessís tapaði 51 milljón króna árið 2017.

Rekstur Emmessíss gekk illa árið 2017 en ársreikningur síðasta árs liggur ekki fyrir. Fyrirtækið tapaði 51 milljón króna árið 2017 og eigið fé var neikvætt um 82 milljónir króna. Árið 2016 gekk mun betur en þá hagnaðist fyrirtækið um 48 milljónir króna. Veltan árið 2017 var 923 milljónir króna.

Í fréttatilkynningu vegna kaupa Pálma á meirihluta í Emmessís kemur fram að náðst hafi umtalsverður rekstrarbati á síðastliðnu ári og 2019 hafi farið vel af stað. Áætluð EBITDA, það er hagnaður fyrir fjármagnsliði og afskriftir, fyrir 2018 sé 64 milljónir króna. Til samanburðar var EBITDA ársins 2016 46 milljónir króna. Í tilkynningunni sagði að Ísgarðar muni leggja Emmessís til aukið hlutafé.

Kjörís tapaði 13 milljónum árið 2017.

Höfuðkeppinauturinn Kjörís glímdi einnig við áskoranir árið 2017 en þá tapaði félagið 13 milljónum króna. Árið áður hafði það hagnast um 56 milljónir króna. Veltan nam 1,3 milljörðum króna árið 2017. Kjörís stendur fjárhagslega vel. Eigið fé var 405 milljónir króna við árslok 2017 og eiginfjárhlutfallið var 58 prósent.

Tollalækkun á ís eykur samkeppni

Vert er að nefna í ljósi rekstrarbata Emmessíss á síðastliðnu ári og í ár að samkeppnin í sölu á ís jókst síðastliðið vor þegar tollar á innfluttan ís og frostpinna lækkuðu úr 30 prósentum í 18 prósent. Samhliða lækkaði magntollur á ís úr 110 krónum á kíló í 66 krónur á kíló.