Þetta er á meðal þess sem kemur fram í mánaðarlegum flutningatölum sem birtar voru í Kauphöll rétt í þessu.

Farþegar í millilandaflugi voru 407 þúsund samanborið við 72 þúsund í júní í fyrra. Þar af voru farþegar til Íslands 176 þúsund og frá Íslandi 57 þúsund. Tengifarþegar voru 174 þúsund eða um 43% millilandafarþega, samanborið við 20 prósent í júní 2021. Stundvísi var 67 prósent en talsverðar raskanir í leiðakerfinu í júní höfðu neikvæð áhrif á stundvísi félagsins. Þetta skýrist aðallega af krefjandi aðstæðum á flugvöllum víða erlendis og töfum í viðhaldi flugvéla vegna truflunar í aðföngum eftir faraldurinn. Sætanýting í millilandaflugi var 83,2 prósent samanborið við 53,6 prósent í júní 2021.

Innanlandsflugið hefur náð sér vel á strik eftir faraldurinn þrátt fyrir að tafir í viðhaldi flugvéla hafi einnig valdið röskunum í innanlandsflugi í júní. Farþegar í innanlandsflugi voru 25 þúsund samanborið við 22 þúsund í júní 2021. Sætanýting í innanlandsflugi var 74,3 prósent, samanborið við 72,7 prósent á sama tíma í fyrra. Seldir blokktímar í leiguflugi voru jafnmargir og á sama tíma 2021. Fraktflutningar voru 7 prósent minni í júní en á sama tíma í fyrra en jukust um 2 prósent á fyrstu sex mánuðum ársins samanborið við sama tímabil í fyrra.

Bogi Nils Bogason, forstjóri Icelandair:
„Við erum með metnaðarfulla flugáætlun í sumar, mikla tíðni á okkar vinsælustu staði og fjölbreytta brottfarartíma innan dagsins til að mæta mikilli eftirspurn eftir flugi nú í sumar. Eins og sjá má hefur fjöldi farþega tífaldast á fyrstu sex mánuðum ársins samanborið við sama tímabil í fyrra. Við höfum gripið til ýmissa aðgerða til að bregðast við krefjandi aðstæðum í rekstrarumhverfinu, bæði vegna aðstæðna á flugvöllum erlendis og vegna áskorana í aðfangakeðjum. Það er forgangsmál hjá okkur að lágmarka áhrif á farþega eins og mögulegt er með ýmsum ráðstöfunum og bættri upplýsingagjöf, bæði í millilandafluginu og innanlands. Sumarið fer mjög vel af stað og við höldum áfram að bæta í. Við hefjum til að mynda flug á tvo nýja og spennandi áfangastaði í dag, Nice og Róm en þessum stöðum hefur verið mjög vel tekið.“