L og I tákna rómversku stafina fyrir 51. Catherine Zeta-Jones fæddist 25. september 1969, og sleit barnsskónum í Swansea. Leiklistin heillaði hana frá unga aldri og hún var staðráðin í að verða leikkona. Leikheimurinn var tilbúinn fyrir Zeta-Jones, sem fékk strax hlutverk sem lítil hnáta í söngleikjunum Annie og Bugsy Malone.

Hún lagði stund á söng og leiklist við Arts Educational School í Lundúnum og vakti strax athygli fyrir hlutverk sitt í 42nd Street árið 1987. Fyrsta kvikmyndahlutverkið var í frönsk-ítölsku myndinni 1001 Nights sem þótti frekar misheppnuð, en stjarna Kötu reis fyrir alvöru í bresku sjónvarpsþáttunum The Darling Buds of May á árunum 1991-1993.

Þegar lítið bólaði á hlutverkum heima á Englandi sem hæfðu jafn fagurri konu og Catherine, fór hún vestur um haf og gerði sig breiða í Hollywood. Þar komu menn strax auga á ómældan kynþokka Zeta-Jones og fékk hún áberandi hlutverk í bíómyndunum The Mask of Zorro og Entrapment. Hún hlaut mikið lof fyrir leik sinn sem ólétt kona í hefndarhug í kvikmyndinni Traffic og morðótt kvendi í söngleiknum Chicago, en fyrir það hlaut hún bæði Óskarsverðlaun og BAFTA-verðlaun sem besta leikkonan í aukahlutverki. Við tóku gæðamyndir eins og Ocean’s Twelve, The Terminal og Intolerable Cruelty, en þegar um hægðist á hvíta tjaldinu sneri Kata aftur á svið leikhúsanna og í sjónvarpsþætti.

Catherine Zeta-Jones styður fjölmörg góðgerðarmál og lætur gott af sér leiða. Barátta hennar við þunglyndi og geðhvarfasýki hefur komist á síður blaðanna, en hún er gift bandaríska leikaranum Michael Douglas og eiga þau tvö börn.

Catherine Zeta-Jones stolt með börnunum sínum tveimur, Dylan Michael Douglas, sem stendur á tvítugu, og Carys Zeta Douglas sem er sautján ára.
Yndisleg tengdadóttir með tengdapabba sínum, leikaranum Kirk Douglas, sáluga.
Einstakir persónutöfrar og sláandi fegurð einkenna þokkadísina Kötu.
Hjónin í stásslegum grímubúningum á hrekkjavökunni í fyrravetur.