Flugfélagið WOW air hóf í morgun lengsta áætlunarflug í íslenskri flugsögu. Um er ræða flug til höfuðborgarinnar Nýju-Delí á Indlandi og er fyrirhugað að flogið verði þangað þrisvar í viku.

Það var því ærið tilefni til að fagna og er ljóst að WOW-verjar eru ánægðir með nýja áfangastaðinn. Á samfélagsmiðlum birtist til að mynda ljósmynd af þessum kátu flugfreyjum með indverska fánann á lofti. Og þó, það virðist einhvers misskilnings hafa gætt því eins og glöggir einstaklingar taka eftir er um að ræða fána Írlands.

Fánarnir eru ekki ósvipaðir og eiga það sameiginlegt að vera hvítir, grænir og appelsínugulir. Línurnar í þeim indverska eru þó láréttar en lóðréttar í þeim írska. Þá er að finna hið svokallaða Ashoka-hjól í dökkbláum lit í þeim indverska.

Hins vegar getur reynst snúnara að bera kennsl á írska fánann þegar fána Afríkuríkisins Fílabeinsstrandarinnar er stillt við hliðina. Þeir eru nefnilega eins á litinn og báðir með lóðréttum línum. Munurinn er sá að græni liturinn er vinstra megin í þeim írska en hægra megin í hinum frá Fílabeinsströndinni.