Margt er farið að skýrast með Eurovision-mynd Wills Ferrell. Samkvæmt erlendum fjölmiðlum er Rachel McAdams sögð ætla að taka að sér aðalhlutverkið í myndinni. Hún er þekkt fyrir hlutverk sitt í The Notebook, Mean Girls og Spotlight, svo nokkrar myndir séu nefndar. Ferrell sló í gegn meðal Eurovision-aðdáenda þegar hann birtist skyndilega í Portúgal og spjallaði við íslenska hópinn. Staðfest hefur verið að tökur muni halda áfram í Tel Avív og að leikarinn ætli að mæta aftur á svæðið.

Netflix gefur myndina út en ekki er komin dagsetning á hana. Ferrell viðurkenndi að hann væri mikill aðdáandi keppninnar og horfði reglulega á. Hann mun skrifa handritið sjálfur ásamt Andrew Steele sem hefur séð um að skrifa fyrir SNL. Jessica Elbaum og Adam McKay verða einnig við stjórnartaumana. David Dobkin mun leikstýra en hann sat í leikstjórastólnum í Wedding Crashers. Vinnutitillinn er ekkert sérlega flókinn því þar er verið að vinna með Eurovision.

Ari Ólafsson og Will Ferrell á keppninni í fyrra. Ferrell er mikill aðdáandi Eurovision og hefur verið í hartnær 20 ár.

Í Portúgal blandaði hann geði við íslenska hópinn og spjallaði meðal annars við Ara Ólafsson söngvara, sem söng framlag Íslands í keppninni. Samkvæmt fréttum sagði Ari honum nokkra brandara sem Ferrell hló að.

Eiginkona Ferrells er sænsk, Viveca Paulin, og hefur hann sagt að áhugi hans á keppninni hafi kviknað 1999 þegar þau fóru í sænskt Eurovision-partí. Síðan þá hefur hann kveikt á sjónvarpinu í hvert sinn sem hann getur. Vitað er að ísraelska sjónvarpið hefur boðið honum að stíga á svið á seinna undanúrslitakvöldinu en ekki hefur fengist staðfest hvort hann hafi þekkst boðið.

Þetta er ekki í fyrsta sinn sem hugmynd hefur verið viðruð um að gera kvikmynd um Eurovision. Árið 2007 ætlaði Dan Bazer, sem gerði Borat, að skrifa handrit að Eurovision – the movie. Snillingurinn Sacha Baron Cohen átti meira að segja að leika aðalhlutverkið. Það varð þó ekkert úr þeirri mynd.