Eigandinn, Júlíus Ingólfsson, segir að fólk hafi verið duglegt við að gera sér ferð fram hjá húsinu fyrir jólin og berja dýrðina augum. Hann hefur gaman af að skreyta og vonar að skreytingagleði hans smiti út frá sér til nágrannanna.

„Það eru ekki mörg hús á Álftanesinu sem eru mikið skreytt en það er alltaf að aukast. En sumum finnst kannski bara nóg að það sé svona mikið skreytt hjá mér. Skrautið er alltaf að aukast hjá mér, ég virðist setja meira upp eftir því sem ég eldist,“ segir Júlíus og hlær.

„Maður er duglegur að kaupa skraut á útsölum og ég hef líka keypt sniðugt dót þegar ég hef farið út. Ég hef ekki mikið breytt uppsetningu á skrautinu á milli ára. Við erum voðalega föst í sama farinu. En eftir að Costco kom með stóra hluti, þá fór maður að dreifa hlutunum aðeins meira,“ segir hann, en hann er til dæmis með stóran snjókarl og jólasveina frá Costco í garðinum.

Utan um húsið eru 700 perur og slatti til viðbótar í garðinum og sífellt bætist við.

Júlíus byrjar yfirleitt á að setja fyrstu ljósin upp síðustu helgina í október og bætir svo hægt og rólega við þegar jólin nálgast. Hann leyfir svo ljósunum í kringum húsið að vera uppi fram í mars, á meðan skammdegið gengur yfir.

„Ég byrja yfirleitt á að hafa einlit ljós en bæti svo við lit þegar komið er fram í miðjan nóvember. Það eru um 700 perur utan á húsinu en ég veit ekki hvað þær eru margar í heild. Það er alveg slatti, alveg vel yfir 1.000, kannski hátt í 2.000 perur,“ segir hann.

Júlíus segist ekki finna neitt sérstaklega fyrir hærri rafmagnsreikningi í kringum jólin.

„Hann hækkar auðvitað eitthvað, en þetta eru led perur, þær eyða ekkert svo miklu. Svo hef ég svo gaman af þessu, svo þetta er alveg þess virði,“ segir hann.

Þegar Júlíus er spurður hvort hann taki fjölskylduföðurinn í jólamyndinni Christmas Vacation sér til fyrirmyndar, hlær hann og segist ekki ganga alveg svo langt.

„Það er mjög skemmtileg mynd og ég horfi á hana á hverju ári, en nei, ég tek hann ekki til fyrirmyndar í skreytingum.“

Stór snjókarl, jólasveinar og hreindýr lýsa upp garðinn.