Dagbjartur Willardsson, fasteignasali hjá Fasteignasölu Reykjavíkur, segir að húsið sjálft sé byggt árið 1892 og viðbygging árið 1997. Fyrrverandi eigandi hafi nostrað við húsið og sérstaklega við garðinn þar sem eru nokkur útihús í sama stíl og húsið.

Grjóthleðslurnar vekja sérstaka eftirtekt en þær voru hlaðnar upp af fyrri eiganda sem sótti grjótið á kerru og bar hvern einasta stein inn í garð og hlóð úr þeim.

Dagbjartur segir að mikil natni hafi verið lögð í allt húsið og lóðina.

Þar er lítil tjörn og enn fremur hús sem er byggt yfir heitan pott og hænsnahús.

„Þetta er ævintýraveröld í Hafnarfirði og fyrrverandi eigandi, sem nú er fallinn frá, var búinn að dunda sér vel í garðinum.“

Hvert einasta smáatriði skiptir máli og er garðurinn einn stór ævintýraheimur fyrir unga sem aldna. Um jólin þótti garðurinn bæjarprýði – svo fallegur var hann.

Húsið er byggt árið 1892 og hét þá Hagakot en viðbyggingin kom árið 1997.

„Þetta er ekkert ofboðslega stórt, ekki svo margir fermetrar en þetta er mjög skemmtilegt hús að vera með í sölu. Gefur starfinu gildi að fá svona inn á borð til sín,“ segir Dagbjartur sem á ekki von á að húsið staldri lengi við á sölu.

Hann segir að húsið sé byggt úr timbri og klætt með bárujárni. Inn af forstofunni er eldhús og er hleri á gólfinu þar sem gengið er niður í þvottahús. Yfir eldhúsi er svo kósí svefnloft. Lítil stofa er inn af eldhúsinu og svo gangur sem liggur að álmu þar sem svefnherbergin og baðherbergið eru.

Dagbjartur bendir á að eignin sé hluti af dánarbúi og að seljandi hafi ekki búið í húsinu og þekki ekki ástand þess um fram það sem kemur fram í opinberum gögnum. Væntanlegir kaupendur eru því hvattir til að skoða eignina vel.

Það er lítið um tilviljanir í garðinum við Austurgötu 31. Hús og annað í stíl.
Stíllinn heldur sér meira að segja langt út á götu. Fréttablaðið/Anton
Haninn hefur trúlega séð nokkuð marga morgna á þessum fallega stað sem hann stendur á.
Hliðið sem svo marga hefur dreymt um að kíkja inn fyrir og skoða.
Á lóð hússins eru hraungrýtisveggir sem fyrri eigandi hlóð úr grjóti sem hann flutti heim á kerru. Í garðinum er tjörn og yfirbyggður heitur pottur.