Á fimmtudagskvöld stendur Hringdu fyrir góðgerðarstreymi þar sem grínistinn Villi Neto mun bregða sér í stafrænan kattarham og spila tölvuleikinn Stray til styrktar Kattholti. Villi var vel á veg kominn með Grandiosa-pitsu þegar Fréttablaðið náði af honum tali.
„Hún Melína Kolka hjá Hringdu, sem stendur fyrir streyminu, bar þetta undir mig og ég var strax mjög til,“ segir Villi sem segist elska kisur. „Mér hefur þótt mjög gaman að streyma í þau skipti sem ég hef gert það. Það er samt leiðinlegt að stilla þessu upp sjálfur heima svo það er frábært að hafa svona umstang í kringum mig.“
Ást Villa á kisum er þó harmi blandin.
„Ég er með alveg bullandi ofnæmi svo ég get lítið gert fyrir þær nema með því að hjálpa í svona fjáröflun,“ segir Villi dapur í bragði.
Þú átt sem sagt auðveldara með pixlaðar kisur?
„Já, hundrað prósent!“
Kattholtin tvö
Það ætlaði allt um koll að keyra í leikjasamfélaginu þegar Stray kom á markaðinn enda eru kisuhermar einstaklega vanræktur markaður. Leikurinn hefur fengið góða dóma en í honum bregður leikmaðurinn sér í hlutverk villikattar í framtíðardystópíu þar sem stafræna byltingin hefur mögulega náð aðeins of langt.
„Ég hef haft auga á honum í einhvern tíma en hef ekki prófað hann enn þá svo það er gaman að fara í hann alveg blindandi,“ segir Villi klár í slaginn fyrir morgundaginn. „Ég fylgdist með honum á Twitter þegar hann kom þangað fyrst svo ég veit kannski aðeins hvað er í gangi en samt ekki.“
Villi er sjálfur leikjakall en hefur ekki náð að sinna dellunni sem skyldi.
„Ég var að kaupa hús svo maður getur ekki beint verið að splæsa í PS5,“ útskýrir hann. „Síðasti leikurinn sem ég spilaði eitthvað af viti var Red Dead Redemption 2 sem er auðvitað alveg geggjaður. Ef ég fæ mér Playstation dett ég ábyggilega inn í FIFA og Rocket League – ég elska boltaleiki eins og alveg týpískur gaur.“
Dagskráin á fimmtudaginn hefst klukkan 18 þar sem kynnar kvöldsins verða með Pub Quiz áður en Villi bregður sér í gervi kattarins. Á eftir honum munu stelpurnar í rafíþróttaliðinu Kröflu halda streyminu áfram með partíleikjunum Overcooked og Jackbox.
„Það er fyndið að benda á að ég er sjálfur að vinna í Kattholti um helgar, í uppsetningunni á Emil í Kattholti,“ segir Villi og hlær. „Mér finnst annars gaman að sjá fólk styrkja þetta flotta starf sem Kattholt stendur fyrir og er spenntur fyrir því að fólk mæti í streymið og hafi gaman með mér.“
Streymið verður aðgengilegt á twitch.tv/hringdu.
