Meðfram jóganu hefur Salome stundað hestamennsku, dans og sund. „Ég hef einmitt náð að upplifa svipaða tilfinningu í þessum greinum eins og þegar ég hugleiði. Þá finn ég kyrrð í huga og tilfinningum,“ segir hún.

Salome er menntaður jógakennari frá Jógaskóla Kristbjargar. „Tíminn sem ég lærði hjá Kristbjörgu var alveg æðislegur og opnaði fyrir mér nýja sýn. Ég fór í námið aðallega til að kafa dýpra ofan í jógafræðin og öðlast betri skilning á jógaheiminum, en ekki endilega til að vera kennari. Þegar náminu lauk bauðst mér að kenna með vinkonu minni úr náminu og ákváðum við að setja saman tíma í Gerðubergi. Í kjölfarið á náminu hjá Kristbjörgu sótti ég svo námskeið í bæði tónheilun og í áfallamiðuðu jóga.“

Jógabók fyrir börn

Salome gaf nýverið út barnabókina Gullveig og Tobbi á ferðalagi þar sem hún samtvinnar sögu og jógastöður í einstaka og skemmtilega barnabók sem hjálpar börnum að stunda jóga, hugleiðslu og nálgast innri frið. Salome segist ekki hafa unnið markvisst með börnum í jóga. „En ég hef aðeins unnið með börnin í kringum mig að undirstöðuatriðum í jóga, eins og hugleiðslu, öndunaræfingum og grunnstöðum. Það sem kom mér svolítið á óvart er hvað mörg börn leita eftir því að finna meiri kyrrð og ró, en kannski er það ekki skrítið því stundum förum við fram úr okkur í amstri dagsins.“

Bókin segir frá góðum vinum sem nota jóga og hugleiðslu til að leysa ótrúlegustu þrautir. Í bókinni er stiklað á samkennd, vináttu, umburðarlyndi, þakklæti og fyrirgefningu. „Í sögunni samtvinnast þessi boðskapur og ævintýri félaganna og hvernig hægt er að nýta sér jógafræðin í amstri dagsins, með því leitast við að búa til okkar eigið jafnvægi. Bókinni fylgir hljóðbók þar sem hægt er að hlusta á alla söguna og leggja bókina frá sér, hugleiða og gera æfingarnar. Ef maður er ekki alveg öruggur á því hvernig jógastaðan er framkvæmd, þá fylgir líka snjallforrit með bókinni sem sýnir nokkrar af stöðunum sem krakkarnir læra í bókinni.“ Hægt er að skoða bókina enn betur á síðu útgefanda, sysla.is, og bókin fæst í helstu bókaverslunum landsins.

Félagarnir Gullveig og Tobbi ferðast um víðan völl og læra að stunda jóga og hugleiðslu til þess nálgast innri frið og finna sitt eigið jafnvægi.

Vildi óska að hún hefði kynnst jóga fyrr á lífsleiðinni

„Ég er svo þakklát fyrir að hafa kynnst jóga því það hefur kennt mér svo margt ómetanlegt. Mér hefur fundist jóga opna fyrir mér annan heim og hafa gert mig víðsýnni. Þá hef ég sérstaklega heillast af jógaheimspekinni og öndunaræfingunum sem gefa manni tækifæri til að skoða samskipti og heiminn út frá öðru sjónarhorni en maður er vanur. Oftast er maður svo litaður af sínu nánasta umhverfi og því er svo dýrmætt að kynnast nýrri sýn og fá að skoða heiminn með öðru hugarfari. En svo er það tilfinningin sem ég fæ þegar ég hugleiði, iðka öndunaræfingarnar og næ að sameina þessa þætti þegar ég fer í jógastöðurnar, þessi tilfinning hefur svo endurnærandi áhrif á mig.“

Salome gaf út barnabók þar sem hún tvinnar jógastöður inn í söguþráðinn á nýstárlegan og skemmtilegan hátt.

Náði stundum ekki að anda almennilega ofan í lungun

„Ég vildi óska þess að ég hefði lært jóga miklu fyrr á lífsleiðinni og náð að tileinka mér þessi fræði fyrr inn í mitt daglega líf. Þess vegna ákvað ég að skrifa þessa bók. Ég var stundum svolítið kvíðið barn, en vissi eiginlega ekki hvað það var. Mér fannst ég stundum ekki ná að anda almennilega ofan í lungun, eins og andardrátturinn næði bara rétt ofan í hálsinn. Ég hélt alltaf að ég væri með svona léleg lungu, en lærði svo síðar meir að finna róna, slaka á og anda djúpt að mér, halda andanum inni og anda vel frá. Þessi æfing, sem hljómar svo auðveld, hjálpaði mér mjög mikið. Það er oft svo mikill hraði á öllu og öllum að við gleymum að staldra við og ég er viss um að þessar æfingar geti gagnast mörgum vel. Mér fannst alveg vanta bækur sem fara inn á þessi fræði fyrir börn hér á Íslandi, þar sem jógafræðin samtvinnast örlítið íslenska umhverfinu.“