Vestfirðir eru efst á lista yfir þau svæði, lönd og borgir til að heimsækja árið 2022 í árlegu vali ferðabókaútgefandans Lonely Planet og hlutu svokallaða Best in Travel viðurkenningu, sem birt var í gærkvöld.

Val Lonely Planet mun beina kastljósi heimsbyggðarinnar að Vestfjörðum sem mun reynast mikil lyftistöng fyrir ferðaþjónustuna á svæðinu og á Íslandi almennt.

Á hverju ári tilnefna ferðarithöfundar, bloggarar og starfsfólk Lonely Planet staði fyrir Best in Travel listann, sá listi fer í kjölfarið fyrir dómnefnd sem velur tíu staði sem þeim þykir svara fram úr.

Þá segir að þeir staðir sem eru valdir búa yfir ákveðnum „Vá faktor“ og hefur einnig lagt sitt af mörkum til framþróunar sjálfbærrar ferðaþjónustu.

„Fyrir uppbyggingu ferðaþjónustu á Vestfjörðum fæst ekki jafn glæsileg viðurkenning og Best in Travel hjá Lonely Planet. Ég hef oft sagt að Vestfirðir eigi mikið inni þegar að kemur að ferðaþjónustu og þarna sjáum við það alveg svart á hvítu að þetta einstaka svæði sker sig úr í samkeppni við alla rómuðustu áfangastaði heimsins.“ segir Díana Jóhannsdóttir hjá Áfangastaðastofu Vestfjarða.

Hún segir áherslan í valinu hafi verið á Hornstrandir, Látrabjarg og Dynjandi sem þessar stærstu náttúruperslur.

„Fjöldi ferðamanna hafi komið skemmtilega á óvart í sumar, sem stjórnaðist þó af tilslökunum á landamærunum. Bandaríkjamenn hafa verið okkar stærsti markhópur sem áður fyrr voru Þjóðverjar. þá er skemmtilegt að nefna að einhver fyrirtæki áttu sitt besta sumar í ár, frá upphafi,“ bætir Díana við.

Rauðasandur er sannkölluð náttúruperla.
Mynd/Aðsend

Viðsnúningur eftir heimsfaraldur

Ferðaþjónusta hefur átt undir högg að sækja vegna COVID-19 síðastliðin tvö ár, en sjá mátti viðsnúning í sumar þegar erlendir ferðamenn ferðuðust í auknu mæli aftur til Íslands og til Vestfjarða þegar létti á ferðatakmörkunum. Búast má við að áhuginn á Vestfjörðum verði enn meiri þegar ferðavilji tekur að glæðast á ný, enda er um að ræða sannkallaða útivistarparadís þar sem hægt er að eyða mörgum dögum í allskonar náttúrutengda afþreyingu, hvort sem það eru gönguferðir, kayak eða bátsferðir.

„Eftir áföll síðustu ára vegna heimsfaraldurs er svona viðurkenning mikið tækifæri fyrir ferðaþjónustu á Vestfjörðum og liður í því að greinin taki næsta stóra skref framávið.

Ferðaþjónustan á Vestfjörðum er að koma sterk til baka eftir heimsfaraldurinn og stefnir hratt uppávið. Saman með uppbyggingu ferðaþjónustusegla eins og á Bolafjalli mun þessi

viðurkenning skipta sköpun fyrir vöxt og viðgang ferðaþjónustu á Vestfjörðum“ segir Jón Páll Hreinsson, bæjarstjóri Bolungarvíkurkaupstaðar.


Laugarnes
Mynd/Aðsend

Ósnortin náttúra

Vestfirsk ferðaþjónusta hefur lagt mikla áherslu á sjálfbæra uppbyggingu og er það ein af ástæðum þess að Vestfirðir eru í dag með silfurvottun frá umhverfissamtökunum EarthCheck.

Náttúran og samfélögin á Vestfjörðum eru helstu auðlindir þeirra, og verður að hlúa að þeim til frambúðar.

„Það er frábær viðurkenning fyrir það þróunarstarf sem hefur átt sér stað í ferðaþjónustu á Vestfjörðum að fá þessa útnefningu frá Lonely Planet.

Það má líka segja að þetta komi á besta tíma, nú þegar við stöndum frammi fyrir því verkefni að vekja áhuga ferðamanna á Íslandi á ný í kjölfar Covid-19, þar sem við munum eiga í

harðri samkeppni við önnur lönd. Íslandsstofa mun vinna því að kynna niðurstöðuna í samstarfi við Áfangastaðastofu Vestfjarða“ segir Sigríður Dögg Guðmundsdóttir,

fagstjóri ferðaþjónustu hjá Íslandsstofu.

Vestfjörðum hefur verið lýst sem einum af fáum áfangastöðunum í Evrópu þar sem hægt er að upplifa ósnortna náttúru með tiltölulega auðveldum hætti.

Val Lonely Planet og viðurkenning á hófstilltri og jarðtengdu nálgun íbúa á svæðinu hefur markað ferðaþjónustuna undanfarin ár og mun styrkja stöðu íslands, og Vestfjarða erlendis á komandi misserum.

Paddle boarding er afar skemmtileg afþreying.
Mynd/Aðsend
Patreksfjörður
Mynd/Aðsend