Dregið hefur verið úr innsendum kökum og eftirtaldar smákökur hlutu fyrstu þrjú sætin. Væri ekki frábært að prófa verðlaunauppskrift fyrir jólin?

1. sæti. Guðný Jónsdóttir

Mæru-lyst

150 g lint smjör

100 g dökkur púðursykur

100 g hrásykur

1 egg

200 g Kornax hveiti

1 tsk. vínsteins lyftiduft

1 tsk. matarsódi

1 tsk. vanilludropar

2 tsk. gróft malað hafsalt

rifinn börkur af einni appelsínu

150 g Síríus karamellukurl.

Hrærið smjör, púðursykur og hrásykur vel saman.

Bætið við eggi, appelsínuberki og vanilludropum og hrærið vel.

Sigtið saman hveiti, vínsteins lyftiduft og matarsóda og bætið við ásamt karamellukurli og hafsalti og hrærið varlega saman við.

Setjið á bökunarplötu með lítilli teskeið, kökurnar renna dálítið út. Bakið við 180°C í 7-10 mín.

Skraut ofan á:

Hvítir súkkulaðidropar

Síríus karamellukurl

Bræðið súkkulaðidropana í vatnsbaði og setjið yfir kökurnar. Stráið karamellukurli yfir.

Kókoskransar með ástaraldinfyllingu hlutu annað sætið en það var Hildur Margrét Ægisdóttir sem bakaði.

2. sæti. Hildur Margrét Ægisdóttir

Kókoskransar með ástaraldinfyllingu

Kókossmákökur:

100 g Kornax hveiti

100 g kókosmjöl

75 g sykur

100 g lint smjör

½ egg

Blandið þurrefnum saman og hrærið. Bætið smjöri og eggi út í og látið hnoðast aðeins í hrærivélinni. Nú þarf að hafa allar kökurnar með eins lögun, ég notaði botninn á non-stick muffins-formum í bakka. Fletjið þær snyrtilega út í botninn, ca 10 g af deigi í hvert form. Fyrir helminginn þarf svo að skera út miðjuna – ég notaði ca 1,5 cm í þvermál, vel hreinsað tússpennalok.

Bakið kökurnar við 180°C í um 3 mínútur eða þar til brúnirnar eru farnar að dekkjast. Þær eiga svo að losna auðveldlega úr formunum ef slegið er létt á botninn. Kælið í ísskáp.

Ástaraldin fylling:

Aldinkjöt með fræjum úr 3-4 ástaraldinum

½ msk. sítrónusafi

1 tsk. smjör

2 egg

2,5 dl sykur

Setjið öll hráefnin saman í skál, hrærið létt og setjið skálina yfir sjóðandi vatn, látið malla á lágum til meðalhita meðan smákökurnar eru útbúnar. Hrærið í við og við. Blandan á að þykkna töluvert. Látið kólna í ísskáp.

Skreyting:

150 g hvítir súkkulaðidropar frá Nóa Síríus

smá kókosmjöl

Bræðið súkkulaðið í skál yfir heitu vatni. Dýfið sléttu hliðinni á kókoskökunni með útskornu miðjunni í súkkulaðið og dreifið örlitlu kókosmjöli yfir. Kælið í ísskáp. Smyrjið hrjúfu hliðina á heilu kókoskökunni með þykku lagi af ástaraldinfyllingunni. Búið svo til samloku sbr. mynd hér á síðunni.

Pistasíudraumur með mjúkkri mandarínu- og karamellufyllingu hlutu þriðja sætið. Það eru þau Karen Lind Hilmarsdóttir og Snorri Viktor Gylfason sem eiga heiðurinn af þessum kökum.

3. sæti. Karen Lind Hilmarsdóttir og Snorri Viktor Gylfason

Pistasíudraumur

250 g smjör við stofuhita

250 g sykur

325 g Kornax hveiti

1 egg

150 g muldar pistasíur

Þeytið smjör og sykur saman þar til er létt og ljóst.

Bætið við egginu og þeytið þar til allt er vel blandað saman

Bætið hveitinu hægt og rólega saman við.

Látið loks pistasíur útí og blandið vel saman.

Bakið litlar smákökur við 200°C í 7-9 mín.

Mandarínujello:

100 g mandarínusafi

20 g sykur

1 ½ matarlímsblað

2 tsk. sítrónusafi

börkur af einni mandarínu

Leggið matarlímið í kalt vatnsbað og leyfið því að standa í 5 mín.

Sjóðið saman mandarínusafa, sykur, sítrónusafa og sítrónubörk.

Þegar það er búið að sjóða í eina mínútu, kreistið vatnið úr matarlíminu og hrærið saman við blönduna.

Hellið blöndunni yfir bakka, með jöfnu þunnu lagi og kælið. Skerið út þá stærð og gerð sem óskað er eftir að fá á smákökurnar.

Karamellufylling:

75 g karamellukurl frá Nóa Síríus

75 g Rjómasúkkulaðidropar frá Nóa Síríus

40 g rjómi

Bræðið karamellukurlið og rjómasúkkulaðið saman yfir heitu vatnsbaði, bætið svo við rjómanum og blandið vel saman. Kælið í 10-15 mínútur áður en þið mótið fyllinguna.

Sigurvegarinn Guðný með verðlaunagripi.

Dómnefnd

- Albert Eiríksson, matarbloggari og lífsnautnaséntilmaður

- Helga Beck, markaðsstjóri hjá Nóa Síríus

- Sylvía Haukdal, kökugerðarmeistari

- Carola Ida Köhler, fulltrúi Kornax og sigurvegari frá því í fyrra