Það er margt skemmtilegt að gerast á samfélagsmiðlum þegar eftir því er leitað. Níu mæður hafa til dæmis sett upp leiksamfélag fyrir foreldra þar sem þeir fá ýmsar hugmyndir um skemmtilegar samverustundir.

„Við leggjum okkur fram við að koma með einfaldar hugmyndir og nýta efnivið sem flestir eiga nú þegar,“ segir Hlín Magnúsdóttir Njarðvík sem er ein af aðstandendum Leiksamfélagsins. Hún segir að það hafi verið Pálína Ósk Hraundal sem fyrst hafi komið með hugmyndina. „Pálína spurði hvort við værum tilbúnar að gera eitthvað skemmtilegt saman á Instagram til að sýna frá okkar daglega lífi. Við erum allar með Instagram-reikning og nýtum hann einmitt til fræðslu og að vera upplýsandi,“ segir Hlín.

Það má alltaf drullumalla.

„Verkefnið byrjaði sem þemavikur þar sem við settum fram eitthvert ákveðið viðfangsefni. Við gerðum slíkan þemamánuði tvisvar sinnum og fundum allar að okkur langaði í meira, það er ótrúlegur kraftur í þessum hópi og við ákváðum því að skella okkur út í Leiksamfélagið af fullum krafti. Við erum níu mæður og búum vítt og breitt um heiminn. Okkar helsta áhersla er nærandi samvera með börnum, í hvaða formi sem hún getur verið. Útivera, nám, leikur, málörvun, náttúran, föndur og bakstur. Okkur langar að veita öðrum innblástur – hver á sinn hátt,“ upplýsir hún.

Ratleikur finnst flestum skemmtilegur.

Fyrir jólin ætla þær að vera með jóladagatal sem byrjar 1. desember. „Á hverjum degi í desember ætlum við að skiptast á að sýna frá skemmtilegum og nærandi samverustundum í aðdraganda jólanna. Þar sem við erum allar ólíkar þá fá fylgjendur gott tækifæri til að skyggnast inn í daglegt líf, kynnast okkur enn betur og vonandi fá góðar hugmyndir. Við erum með tæplega 1.800 fylgjendur og vonumst til að þeim fjölgi á næstunni,“ segir Hlín og bætir við að aðgangurinn sé ókeypis, verkefnið sé hugsjón hjá þeim öllum.

Jólaföndur með fjölskyldunni.

„Það er auðvitað nokkur vinna á bak við þetta en við spáum ekki mikið í það. Við erum allar metnaðarfullar og viljum vanda til verka. Þetta er gríðarlega skemmtileg vinna sem gefur okkur mikið. Okkar draumsýn er í raun að hafa jákvæð áhrif á fjölskyldu og barnasamfélagið, veita innblástur og vera hvetjandi. Við höfum fengið góða gesti með okkur í lið á Instagram og vonandi heldur samfélagið áfram að vaxa og dafna.“ ■

Samvera úti í náttúrunni.

Hverjir standa á bak við verkefnið?

■ Hlín Magnúsdóttir – málþroski, nám og að læra í gegnum leikinn

■ Pálína Ósk Hraundal – fjölskyldustundir og útivist

■ Alma Rut Ásgeirsdóttir – fjölskyldustundir, föndur og leikur

■ Sigrún Yrja Klörudóttir – leikur barna

■ Sólveig María Svavarsdóttir – heimakennsla og hæglæti

■ Guðný Valborg Guðmundsdóttir – hæglæti, sjálfbærni og náttúran

■ Sabína Steinunn Halldórsdóttir – hreyfifærni í náttúrunni

■ Hrefna Pálsdóttir – föndur, skynjun og útivera.

■ Halldóra Kristín Bjarnadóttir – fjölskyldustundir, útivera, föndur og bakstur.

instagram.com/leiksamfelagid

Að lita mynd, til dæmis handa ömmu og afa, er alltaf gaman.
Hlín Magnúsdóttir Njarðvík er ein þeirra mæðra sem standa á bak við Leiksamfélagið á Instagram. MYNDIR/AÐSENDAR