Baldur Freyr Einars­son, fram­kvæmda­stjóri Lausnarinnar, fjöl­skyldu- og á­falla­mið­stöðvar, lýsti hrotta­fullum at­burðum sem hann hefur upp­lifað um ævina í nýjasta hlað­varps­þætti Sölva Tryggva­sonar.

Baldur rataði í alla helstu fjöl­miðla landsins árið 2002 vegna stór­felldrar líkams­á­rásar sem leiddi hinn 22 ára gamla Magnús Frey Svein­björns­son til dauða. ,,Þessi slags­mál sem urðu til þess að þessi drengur lét lífið voru miklu minni en margt annað sem ég hafði gert,“ út­skýrir Baldur sem frétti ekki fyrr en morguninn eftir að maðurinn væri al­var­lega slasaður.

Hann lýsir því að hafa brotnað saman þegar hann fékk fréttirnar hjá eigin­manni systur móður hans. „Ég var á þessum tíma hand­rukkari og fíkni­efna­sali og þarna var ég há­grátandi….svo sat ég þarna hjá honum reykjandi út í eitt að reyna að ná mér niður áður en ég myndi gefa mig fram.“ Kveikt var á texta­varpinu þar sem fram kom að ungur maður lægi þungt haldinn á gjör­gæslu.

Refsingin að hafa banað manni

„Svo er ég kominn í gæslu­varð­hald út af þessu og lúgan var opnuð og ég fæ síma í hendurnar og það er lög­maðurinn minn. Hann segir mér að málið sé breytt af því að strákurinn sé dáinn. Þar með var hans kafli búinn og ef ég hefði hætt fyrr væri hann enn á lífi.“

„Að bera það að hafa tekið lífið af ein­hverjum var mín refsing.“ Refsingin hafi ekki verið að sitja inni á Litla Hrauni. „Mín refsing var að þurfa að horfast í augu við það að hafa tekið 22 ára gamlan strák úr þessu lífi. Fjöl­skyldan hans þarf að lifa með því og fjöl­skyldan mín þurfti að lifa með því að ég væri orðinn dæmdur of­beldis­maður.”

Rak vændis­hús

Baldur var dæmdur í þriggja ára fangelsi fyrir á­rásina en segir fangelsis­vistina ekki hafa breytt honum. ,,Ég var hættur að beita of­beldi og var allt annar karakter, en ég var í raun ekki breyttur.“

Á meðan hann sat inni var hann enn að selja eitur­lyf og þegar hann losnaði hélt það á­fram. „Ég var búinn að vera að flytja inn fíkni­efni og reka vændis­hús, með nóg af völdum og peningum. En ég fattaði að mér leið ömur­lega inni í mér.“

Baldur tók því skrefið og fór í 12 spora sam­tök í byrjun apríl 2007 þar sem vonar­glæta kviknaði. „Fyrstu skrefin sem maður tekur er að finna æðri mátt og þar fann ég eitt­hvað sem mig hafði vantað alla ævi. Þá fæ ég enn­þá meiri von og þar byrjaði breytingin fyrir al­vöru.”

Systirin lést að­eins tví­tug

Yngri systir Baldurs lést skömmu eftir að hann var kominn úr fangelsi. ,,Hún var í partýi þar sem henni var boðið eitrað MDMA og lést eftir að hafa tekið það. Það munaði litlu að ég færi í gamla gírinn eftir það.“

Sem betur fer hafi Baldur ekki vitað allt sem gerðist í um­ræddu teiti og brást því rétt við. „Ég fékk þessar fréttir og það var bara eins og ég fengi rýting í gegnum hjartað. Hún var hetjan okkar, var í lands­liðinu í fót­bolta á leiðinni í há­skólann. Svo datt hún í það á af­mælis­daginn sinn þegar hún var tví­tug og fór í vit­laust partý.“

Breyttur maður

Löngu síðar fékk Baldur fregnir af því að mynd­band væri til af systur hans í partíinu þar sem hún var ber að ofan. „Löggan sagði mér þetta ekki, sem var kannski eins gott. Gömlu fé­lagar mínir komu til mín eftir að þetta gerðist og buðust til þess að sjá um þennan gaur sem lét hana hafa eitur­lyfin.“

„Þeir sögðu mér að ég þyrfti ekkert að hugsa um þetta aftur, en ég þyrfti bara að kinka kolli og þá myndu þeir ganga frá henni. Ég kinkaði kolli í öllum sárs­aukanum, en daginn eftir fór ég út að hlaupa og allt í einu leið mér eins og hún væri með mér og ég heyri inni í höfðinu á mér röddina hennar segja við mig: ,,Hvernig viltu muna eftir mér”

Þessi skila­boð voru líkt og á­kall frá guði og hringdi Baldur strax í fé­laga sína og bað þá að láta strákinn í friði. „Þarna var restin af ein­hverju gömlu að deyja innra með mér.”

Getur aldrei bætt mistökin

Baldur hefur í ára­raðir unnið við að hjálpa fólki sem villst hefur af braut í lífinu. Hann segir það einu leiðina til að reyna að bæta fyrir það sem hann hefur gert. ,,Ég geri mér grein fyrir því að ein­hverjir munu dæma mig í þessu við­tali. Ég get ekkert gert til þess að bæta upp fyrir það sem ég hef gert.“

Eftir að Baldur ræddi við fjöl­skyldu mannsins sem hann varð að bana áttaði hann sig á því að hann gæti aldrei bætt fyrir mis­tök sín. „En ég vildi láta þau vita að mitt líf myndi snúast um að stuðla að því að forða öðrum frá því að gera það sem ég gerði. Mitt líf mun snúast um það á meðan ég er á lífi að reyna að forða öðrum frá því að fara þá braut sem ég fór.“

Kominn í neyslu 12 ára

Baldur ólst sjálfur upp við hrotta­legar að­stæður, þar sem harka­legt of­beldi og neysla voru dag­legt brauð. „Ég er orðinn alveg grjót­harður 10 ára og 12 ára er ég kominn í neyslu. Ég sniffaði tippex og gas og fleira, allt til þess að losna við þennan stans­lausa kvíða­hnút sem var búinn að vera í maganum á mér frá því að ég man eftir mér.“

„Þegar maður elst upp við að­stæður eins og ég er tengingin við hjartað orðin beygluð strax í barn­æsku og maður fer í vörn við allt sem heitir mót­læti.“

Bjó til sprengjur

Ég komst yfir ,,Anarchy´s Cook­book” þegar ég var 13 ára og þar lærði ég að búa til sprengjur, lærði um þrýsti­punkta á fólki og fleira. En þetta snerist í grunninn allt um að enginn gæti meitt mig. Í mörg ár var það þannig að alltaf þegar ég kom inn í her­bergi með fólki var ég búinn að reikna út hvar ösku­bakkinn væri og fleira sem ég gæti notað til að verja mig með of­beldi ef eitt­hvað kæmi upp á. Ég var í raun í stans­lausu ,,Fig­ht or Flight” á­standi,” segir Baldur, sem ólst upp við hluti sem fæstir þurfa nokkurn tíma að horfa upp á:

,,Syst­kini mín voru tekin af heimilinu, en ég var skilinn eftir. Of­beldið sem ég horfði á sem barn var hrotta­legt og stjúp­faðir minn stundaði það að láta mig horfa á þegar hann var að beita mömmu of­beldi. Ég man eftir því þegar hann lét mig horfa á þegar hann var að lemja hana þegar ég var 6-7 ára gamall. Svo les ég barna­verndar­skýrslur núna þar sem hann heldur því fram að ég hafi verið vanda­málið í sam­bandi hans og mömmu. Í dag hugsa ég hversu lasinn þessi maður var, en það var hræði­legt að vera þessi litli strákur sem upp­lifði þetta.”

Þáttinn í heild má sjá hér að neðan: