Klúrt tíst Þór­dísar Gísla­dóttur rit­höfundar rataði á skjá lands­manna í beinni út­sendingu í kvöld. Út­varps­stjóri segir heppi­legra ef töf hefði verið á beinu út­sendingunni til að hægt hefði verið að koma í veg fyrir það.

Í spjall­þætti Gísla Marteins Baldurs­sonar Vikunni hefur skapast hefð fyrir því að birta nokkur vel­valin tíst á­horf­enda neðst á skjánum á meðan á þættinum stendur. Tíst Þór­dísar var eitt þeirra sem valið var í þætti kvöldsins.

Tístið á skjánum.
Skjáskot/Rúv

„Þór­ólfur hefur gefið grænt ljós á faðm­lög en hve­nær má fólk byrja að ríða eins og rófu­lausir hundar“ skrifaði Þór­dís á Twitter og merkti þáttinn við tístið.

Nokkur um­ræða hefur skapast síðustu daga um beinar út­sendingar RÚV og hvort ekki væri eðli­legra að hafa þær allar ör­lítið eftir á til að hægt sé að klippa á út­sendingar ef eitt­hvað kemur upp á, sem ekki á heima á skjáum lands­manna.

Stefán Ei­ríks­son út­varps­stjóri sló á létta strengi eftir að tíst Þór­dísar birtist á skjánum í kvöld. „Nú hefði verið gott að vera með 30 sek. töf á út­sendingunni,“ skrifaði hann við tíst hennar.