„Ég syndi og mæti mönnum og það eru köll og svo nær maður bátnum sem betur fer fyrir rest,“ segir Halldór Gunnarsson vélstjóri í þættinum Útkall á Hringbraut í kvöld, um þegar hann syndir um hávetur í niðamyrkri og ískulda að björgunarbát sem var þó hálf botnlaus, óvitandi um hvaða skipverjar og félagar myndu halda lífi.
Halldór var einn þeirra sem bjargaðist þegar Ms.Suðurland sökk á jólanótt 1986 norðan við heimskautsbaug. Fyrri þátturinn um þennan hrikalega atburð og miklu björgun er á dagskrá í kvöld og þar birt myndefni tengt atburðinum.
Ellefu voru um borð og sex fórust. Hinir fimm sem lifðu stóðu í sparifötunum einum upp í hné í 13 klukkustundir.
Halldór lýsir því m.a. hvernig hann kastast af skipinu í gríðarlegum öldum, í jólafötunum og björgunarvesti - ekki var til að dreifa flotgöllum – og með krafti sem hann vissi ekki að hann byggi yfir synti hann að björgunarbátnum.
Útkall í Atlantshafi á jólanótt kom út árið 1999 og þar kemur m.a. fram að einn skipverjanna sem lifðu af hefur haldið því fram að skipið hafi verið tekið niður af sovéskum risakjarnorkukafbáti.
Í þáttunum um skipbrot Suðurlandsins er einnig sagt frá dönskum bjargvættum mannanna.
Þættirnir Útkall eru í umsjón Óttars sveinssonar á Hringbraut og frumsýndir vikulega Kl.19.30 á þriðjudögum.
Óttar ræðir þar við einstaklinga sem komið hafa við sögu í bókum hans um stórslys og björgun á og við Ísland.
