Hjónin Davíð Örn Jóhannsson og Jana Maren Óskarsdóttir hafa staðið í stórræðum og nýtt tímann vel í faraldrinum. Þau opnuðu búðina Hringekjuna við Þórunnartún 2, sem er það sem margir hafa íslenskað og kallað loppubúð. Þar getur fólk selt notaðar vörur og gefið þeim þar með nýtt líf. Bæði misstu þau vinnuna í fyrstu bylgju COVID-19 en ákváðu að hugsa í lausnum og vinna að opnun Hringekjunnar.

„Við ákváðum að reyna að nýta sumarið í það að búa okkur til nýtt verkefni til að vinna að saman. Eftir að hafa ferðast vítt og breitt um landið í sumar skaut þessi hugmynd upp kollinum í bongóblíðu á Seyðisfirði í ágúst og við erum búin að vinna þétt að þessu verkefni síðan,“ segir Davíð Örn.

Fréttablaðið/Ernir Eyjólfsson

Áhugafólk um endurnýtingu

Segðu mér frá tilkomu nafnsins, Hringekjan?

„Við eyddum langri helgi í sumarbústað á Kirkjubæjarklaustri í september þar sem við fórum í miklar pælingar í þeim tilgangi að finna nafn sem myndi vera íslenskt og hafa góða tengingu í fyrir hvað við stöndum. Hringekjan varð á endanum fyrir valinu þar sem það er fallegt íslenskt orð sem hefur þessa tengingu við hringrásarhagkerfið sem við vorum að leitast eftir,“ segir Jana Maren.

Sjálf hafa þau lengi verið mikið áhugafólk um endurnýtingu.

„Í gegnum tíðina höfum við mikið keypt af notuðum fatnaði og innanstokksmunum fyrir heimilið. Einnig verður að árétta að við lifum á þeim tímum þar sem við þurfum öll að fara að vakna upp frá neysluhyggjunni ef við ætlum okkur ekki að ganga endanlega frá jörðinni, Hringekjan er okkar framlag í þessa baráttu og vonum við að henni fylgi aukin vitundarvakning til frambúðar,“ segir Davíð.

Davíð segir mikilvægt að fólk taki að vakna frá neysluhyggjunni.
Fréttablaðið/Ernir Eyjólfsson

Í eigin kúlu

Hvernig hefur gekk vinna að opnuninni?

„Við höfum í raun og veru verið hálf ónæm fyrir COVID þar sem við erum búin að vera að vinna að þessu verkefni síðustu mánuði í okkar eigin kúlu, það eru kannski frekar jákvæð áhrif sem við höfum orðið fyrir. Vinir og vandamenn hafa haft meiri tíma en ella til þess að veita okkur hjálparhönd og það verður að segjast að öll hjálp sem við höfum fengið frá vinum og vandamönnum er ómetanleg,“ svarar Jana Maren.

Hringekjan er stödd við Þórunnartún 2.

Jana og Davíð eru þakklát vinum og vandamönnum sem veittu þeim dyggilega aðstoð við að setja um verslunina.
Fréttablaðið/Ernir Eyjólfsson