Meistaranemar í ritlist gáfu út bókina Möndulhalli nú á dögunum, smásagnasafn um skekkjuna í tilverunni.

Bókaútgáfan er hluti af námskeiðinu „Á þrykk“ þar sem nemendur í ritlist og ritstjórn við HÍ kynnast ferlinu við að gefa út bók; frá fyrstu drögum að prentun. Í þetta sinn var ákveðið sögurnar yrðu allar að vera aðeins á skjön.

„Eitthvað undarlegt að gerast og jafnvel eitthvað óraunverulegt,“ segir í tilkynningu frá ritlistar- og ritstjórnarnemum.

„Möndulhalli er undirstaða lífs á jörðinni eins og við þekkjum það en hver eru áhrif skekkjunnar á hversdaginn? Það blasir við í smásögum þessa safnrits, þar sem áföll erfast, stormar geisa, sonur verður faðir sinn, barn tekst á við berkla, flóðhestur gengur um götur Reykjavíkur og fólk yfirgefur jörðina eða snýr þangað aftur. Auk þess er stolið, málað, klórað, flogið, rifist og köttur mætir skelfilegum örlögum. Allt virðist aðeins á skjön.“

Hópur rithöfunda og ritstjóra koma saman til að gefa út smásögur um óraunveruleikann.
Mynd: Eva Schram

Una útgáfuhús sá um útgáfuna og hélt Sigþrúður Gunnarsdóttir utan um námskeiðið.

Höfundarnir eru Auður Stefánsdóttir, Dominique Gyða Sigrúnardóttir, Haukur Hólmsteinsson, Marinella Arnórsdóttir, Ólöf Sverrisdóttir, Rebekka Sif Stefánsdóttir, Sigríður Helga Jónasdóttir, Stefán Ágústsson, Tómas Ævar Ólafsson og Örvar Smárason.

Ritstjórar eru Einar Kári Jóhannsson, Fanney Benjamínsdóttir, Hólmfríður María Bjarnardóttir, Sahara Rós Ívarsdóttir, Sóley Frostadóttir og Þóra Sif Guðmundsdóttir.

Elín Edda Þorsteinsdóttir sá um hönnun og Þórhildur Sverrisdóttir sá um umbrot.