Fyrsti ratleikurinn frá Sýslu, menningu og listum, verður settur í gang á Akranesi um helgina og hentar leikurinn sérlega vel fyrir fjölskyldufólk. Sýsla, menning og listir er lítið sprotafyrirtæki sem hefur verið að vinna með íslenskt hand- og hugverk, þar sem áhersla er lögð á að útbúa spil, leiki, þrauta- og hljóðbækur og snjallforrit. Nú er svo komið að fyrirtækið hefur framleitt glænýtt ratleikja-app sem er frábær skemmtun fyrir alla fjölskylduna til þess að fagna sumrinu. Einnig er þetta hvatning til útiveru og ævintýralegra samverustunda.

„Appið er stórskemmtileg afþreying fyrir fólk á öllum aldri, en er hugsað fyrir krakka frá sirka 7 ára aldri og upp úr,“ segir Salome Friðgeirsdóttir, framkvæmdastjóri Sýslu.

„Hugmyndin að ratleikja-appinu kom upp fyrir ári þegar okkur fannst vanta skemmtilega afþreyingarleiki fyrir fjölskylduna á ferð um landið, sem væri í senn skemmtilegir og fræðandi. Í kjölfarið fórum við að hanna grunn að ratleikja-appi og erum nú virkilega ánægð með útkomuna,“ segir Salome.

Sýslu fannst vanta afþreyingamöguleika fyrir fjölskyldur á ferð og flugi um landið í sumar og hannaði þess vegna ratleikja appið. Mynd/Pétur Ásgeirsson.

Fyrsti ratleikurinn á Akranesi þessa helgi

Fyrsti ratleikurinn í ratleikja-appinu er á Akranesi um helgina og er kynntur í samstarfi við Írska daga þar í bæ. Að sögn Salome þarf alls ekki að vera kunnugur Akranesi til þess að taka þátt í leiknum.

„Það er alltaf hægt að finna staðsetninguna með GPS-korti í leiknum. Einnig er hægt að fá vísbendingar, þannig að þetta ætti að vera nokkuð skemmtileg áskorun fyrir bæði kunnuga sem ókunnuga.“

Komdu í stjörnuleit

Markmið ratleiksins er að ferðast um Akranes hvort sem er gangandi eða á hjóli og kynnast skemmtilegum stöðum í bænum, ásamt því að safna stjörnum sem birtast í forritinu við hin ýmsu kennileiti víðs vegar um Akranes. Til þess að finna ratleikjastoppin og vinna stjörnu þarf að smella á hnappinn „að byrja leitina“. Um leið og smellt er á hnappinn opnast myndavél í símanum þar sem þú skannar með símanum yfir svæðið þar sem þig grunar að rétta stoppið sé. Ef þú hefur valið rétt svæði birtist stjarna, og til að halda áfram á næsta stopp þarf að smella á stjörnuna.

Þess má geta að leikurinn hleður ekki niður neinum upplýsingum um notendur, en til að geta spilað leikinn þarf að gefa appinu aðgang að staðsetningu (location) og myndavél símtækisins.

Væri ekki tilvalið að skella sér í ratleik á Akranesi um helgina?

Frítt fyrir notendur

Snjallforritið er aðgengilegt bæði á App Store og Google Play öllum að kostnaðarlausu.

„Ratleikja-appið mun alltaf koma til með að vera frítt, en bæjarfélög, stofnanir eða fyrirtæki sem vilja starfa með okkur mega endilega hafa samband við okkur gegnum postur@sysla.is og við setjum saman flottan leik.“

Sýsla sér fram á að setja saman enn fleiri ratleiki vítt og breitt um landið.

„Þá verða bæði leikir fyrir yngri kynslóðina, sem og ratleikir sem sniðnir eru að eldri kynslóðinni og þá með fleiri þrautum og leikjum,“ segir Salome.