Það eru ákveðin tákn sem ég hafði til hliðsjónar við hönnun slaufunnar. Þegar maður horfir á hálsmenið blasir við blóm sem hringar sig niður slaufuna og vísar í vellíðan og jákvæðni. Hringurinn utan um blómið táknar svo kvenlega orku og vernd,“ útskýrir Guðbjörg Kristín Ingvarsdóttir, gullsmiður og skartgripahönnuður Aurum.

Guðbjörg hefur haft veg og vanda af undurfagurri Bleiku slaufunni í ár.

„Innblásturinn sótti ég í íslenska náttúru eins og glöggt má sjá. Þegar haft var samband við mig og ég beðin um að hanna slaufuna í ár hafði ég verið að vinna að 20 ára afmælislínu Aurum í þó nokkurn tíma og hluti af því vinnuferli smellpassaði inn í hönnun Bleiku slaufunnar. Það verður því spennandi að fylgjast með framhaldinu og verður jafnvel hægt að fá sér eyrnalokka úr afmælislínunni sem passa vel við hálsmenið eða Bleiku slaufuna. Þetta er tenging sem mér þykir ákaflega vænt um.“

Glæsileg viðhafnarútgáfa Bleiku slaufunnar í ár er í þremur útgáfum.

Karlar bera hálsmenið líka

Guðbjörg hefur frá upphafi fylgst vel með hönnun Bleiku slaufunnar.

„Bleika slaufan er frábært framtak og samstarf Krabbameinsfélags Íslands við Félag íslenskra gullsmiða er til fyrirmyndar. Það er gott fyrir gullsmiði að geta lagt þessu þarfa málefni lið og það vekur athygli á þeim út á við. Mér þykja algjör forréttindi að fá að taka þátt í þessu verkefni og vinna með því frábæra fólki sem kemur að því einstaka starfi sem unnið er hjá Krabbameinsfélaginu,“ segir Guðbjörg.

Hún sá Bleiku slaufuna sína fljótt fyrir hugskotssjónum.

„Slaufuformið sjálft er frekar einfalt form að vinna með og er það því ákveðin áskorun að gera það að sínu. Í ár var ákveðið að Bleika slaufan yrði eingöngu hálsmen og er það í fyrsta sinn. Mér finnst það skemmtileg tilbreyting og veit að karlmenn hafa líka verið að bera það. Sjálfri finnst mér ekkert síðra fyrir karlmenn að bera hálsmen en nælu og vitaskuld eiga þeir að vera alls ófeimnir við það,“ segir Guðbjörg.

„Ég hef tekið eftir að yngri kynslóðir karlmanna eru óragari við að skarta Bleiku slaufunni um hálsinn enda er það sýnilegt tákn um samstöðu og stuðning við mikilvægt verkefni sem snertir okkur öll,“ segir Guðbjörg og bendir á að hægt sé að nota menið sem nælu með því að þræða sikrisnælu í gegnum krókinn sem keðjan hangir á.

Guðbjörg var að vinna að 20 ára afmælislínu Aurum þegar hún var beðin um að hanna Bleiku slaufuna og hluti af því vinnuferli passaði vel inn í hönnun slaufunnar. FRÉTTABLAÐIÐ/­ANTON BRINK

Ánægjulegt ferli

Í Aurum gerði Guðbjörg einnig glæsilega viðhafnarútgáfu af Bleiku slaufunni.

„Viðhafnarútgáfan er stærra hálsmen og kom það út í þremur útgáfum; silfri, silfri með bleikri emaleringu og gylltu silfri. Við gerðum 240 eintök sem seldust upp á aðeins þremur dögum enda þykir eftirsóknarvert að eiga Bleiku slaufuna í viðhafnarbúningi. Sjálf á ég gylltu slaufuna sem er í algjöru uppáhaldi og við teymið mitt erum hæstánægð með hvað slaufan fór vel af stað og hitti svona vel í mark,“ segir Guðbjörg með stolti og gleði.

„Mér þykir ákaflega gleðilegt og mikils virði að geta komið að samfélagsmálum með þessum hætti. Aurum hefur á síðustu árum stutt góðgerðarfélög bæði til lengri og skemmri tíma en það samræmist mínum gildum og fyrirtækisins. Vinnan við Bleiku slaufuna var einstaklega ánægjulegt ferli og þetta er skartgripur sem lifir, tímalaust hálsmen sem hægt er að bera áfram.“

Á uppboðinu verða boðin upp sérsmíðuð gullhálsmen og gullnæla, sú eina sem framleidd er í átakinu í ár. Þessar aðalslaufur eru úr 14k gulli með bleikum demöntum.

Gullslaufur boðnar upp

Bleiki dagurinn er á morgun, föstudaginn 11. október, en á þriðjudaginn 15. október klukkan 16 verða boðnar upp tvær gullslaufur til styrktar Bleiku slaufunni.

„Um er að ræða sérsmíðað gullhálsmen og gullnælu, þá einu sem framleidd er í átakinu í ár. Þessar aðalslaufur eru frábrugðnar hinum að því leyti að þær eru úr 14 karata gulli með bleikum manngerðum demöntum sem hafa sömu eiginleika og efnasamsetningu og náttúrulegir demantar,“ upplýsir Guðbjörg og allur ágóði rennur beint til Krabbameinsfélagsins.

„Þetta eru einstakir skartgripir og sannkölluð listasmíð hjá Guðbjörgu. Það verður spennandi að sjá hvar þessir kostagripir lenda eftir uppboðið og við hvetjum alla sem kunna að meta fallega og vandaða hönnun til að leggja þessum mikilvæga málstað lið,“ segir Halla Þorvaldsdóttir, framkvæmdastjóri Krabbameinsfélagsins.

Sjá nánar á bleikaslaufan.is