Á tískuviku í New York fyrir stuttu var sýndur tískuklæðnaður fyrir unglinga sumarið 2020. Klæðnaðurinn var fjölbreyttur og mjög frjálslegur. Fermingarbörn sem ekki eru þegar ákveðin í fatavali fyrir stóra daginn geta kannski fengið einhverjar hugmyndir með því að skoða þessar myndir frá tískuvikunni. Litirnir eru skemmtilegir og vel er hægt að raða ólíkum fatastíl saman. Stuttbuxur voru nokkuð áberandi en þess má geta að fermingarstúlkur árið 1971 voru margar í stuttbuxum sem var tíska þess tíma á móti svokallaðri maxi tísku.

Grænt tjullpils við gallajakka hljómar kannski undarlega en stúlkan sem klæddist því dressinu á tískuvikunni var ekki bara töff heldur einnig óvenjulega klædd. Þannig má leika sér með snið, efni og liti.

Unglingar í dag eru frjálslegir og óhræddir við að klæðast eftir eigin smekk. Það er líka um að gera að leyfa hugmyndafluginu að ráða för. Fyrstu fermingar eru í lok mars en stærstu fermingardagarnir eru um páskana sem nú verða um miðjan apríl. Sjálfsagt eru margir foreldrar komnir á fullt við undirbúning því að mörgu þarf að hyggja áður en boðið er til stórrar veislu.

Grænt tjullpils við gallabuxnajakka. Frekar frumlegur klæðnaður.
Fallegur glitrandi sparikjóll frá AC Alyssa Casa. Þessi myndi alveg sóma sér vel sem fermingarkjóll en hann var sýndur á tískuvikunni í New York í byrjun febrúar.
Kjóll og jakki úr sama efni. Minnir svolítið á gamla Chanel-stílinn.
Blár smóking er alltaf afar glæsilegur fatnaður.
Glæsilegur silkikjóll með blúndu með silfurþráðum yfir pilsinu.
Þessi kjóll er svolítið sérstakur en mjög fallegur.
Bleik buxnadragt.Góð hugmynd fyrir fermingarstelpu.
Stuttbuxur og jakki í stíl. Stuttbuxur sem þessar voru mikið í tísku 1971.