Grænmetislasagna

fyrir tvo til fjóra

Rauð sósa

  • 1 eggaldin, saxað í bita
  • ½ kúrbítur, saxaður í bita
  • 5 sveppir, saxaðir
  • ½ púrrulaukur, saxaður og skolaður
  • 2 stilkar sellerí, saxað
  • 3 gulrætur saxaðar
  • 1 paprika söxuð
  • 4 hvítlauksrif
  • ¾ lítil dós tómatpúrra eða um 3 msk.
  • 1 tsk. rósmarín, þurrkað
  • 1 tsk. timjan, þurrkað
  • 1 tsk. chiliflögur
  • 2 dósir hakkaðir tómatar
  • 1 dós linsubaunir, skolaðar
  • 1 stöngull af basilíku

Steiktu eggaldin, kúrbít og sveppi á miðlungsháum hita í potti með olíu uns það hefur linast mikið. Settu næst gulrætur, púrrulauk, sellerí og papriku út í og steiktu uns það linast líka. Settu því næst tómatpúrru, kreistan hvítlauk og krydd út í pottinn og steiktu uns skán myndast á botninum.

Helltu næst tómatdósum og linsubaunum út í og eldaðu í um 10 mínútur eða uns sósan hefur þykknað. Smakkaðu loks til með salti, pipar, ediki og sriracha-sósu.

Hvít sósa

  • 1 stór dolla kotasæla
  • ½ rifinn mexíkóostur
  • 2 msk. rjómaostur
  • Rifinn parmesanostur

Sett í blandara og blandað uns orðið mjúkt.

Settu fyrst smá rauða sósu í lasagnamót og raðaðu lasagnaplötum yfir. Svo er röðin svona: rauð sósa, hvít sósa, lasagnaplötur. Endaðu á hvítri sósu og svo rifnum osti efst.

Bakaðu í ofni á 180°C í um 40 mínútur (eða uns lasagnaplöturnar eru eldaðar í gegn) með álpappír yfir. Þá er álpappírinn tekinn af, parmesanostur rifinn yfir og lasagnað er klárað í ofninum þar til osturinn hefur fengið á sig gullinbrúnan lit. Berið fram með ferskri basilíku og nýmöluðum pipar.

Chili mínus kjöt

Fyrir 3–4

Eldunartími 70 mínútur. Undirbúningur um hálftími. Borið fram með hrísgrjónum.

Chilipottréttir eru sívinsælir, með kjöti eða án kjöts. Fréttablaðið/Getty
  • 4 sveppir
  • 1 rauðlaukur, saxaður
  • 2 stilkar sellerí, saxaðir
  • 2-3 gulrætur, saxaðar
  • 1 paprika
  • 2 msk. tómatpúrra
  • 1 tsk. kóríanderduft
  • 1 tsk. cumminduft
  • 1 tsk. chiliflögur
  • 1 msk. paprikukrydd
  • Smá klípa af kanil
  • Um 2 msk. salt og nýmalaður pipar eftir smekk
  • 2 lárviðarlauf
  • 4 hvítlauksrif
  • 1 chipotle chili in adobo úr dós og 1 tsk. af sósunni (eða meira ef þú vilt hafa þetta sterkt)
  • 1 dós hakkaðir tómatar
  • 1 dós svartbaunir eða nýrnabaunir með safanum úr dósinni
  • 1 soðteningur að eigin vali
  • Soðið vatn (uns kássan er orðin aðeins þynnri en þú vilt að hún sé í lokin)
  • ½ dós maís skolaður (eða frosin maískorn)
  • ⅓ poki Halsans-sojahakk
  • 1–3 msk. rjómaostur
  • Saxaðir kóríanderstilkar
  • Um 1 msk. edik

Byrjaðu á því að saxa niður sveppi og setja í þurran pottinn með um matskeið af vatni og smávegis af salti. Leyfðu vatninu að losna úr sveppunum og sjóða af. Settu um matskeið af olíu út í og steiktu sveppina ásamt rauðlauk, selleríi og gulrótum. Þegar grænmetið hefur linast er paprikan sett út í og elduð í gegn.

Næst skal ýta grænmetinu til hliðar og búa til pláss fyrir tómatpúrruna. Skelltu henni út í með smá olíu ef þarf og steiktu í um ½–1 mínútu. Kreistu næst hvítlauksrif út í ásamt söxuðum adobo chili og sósu og steiktu í um ½ mínútu. Settu næst allt kryddið út í ásamt lárviðarlaufunum og leyfðu þeim að vakna í olíunni og hitanum í um ½ mínútu. Leystu soðteninginn upp í soðnu vatni.

Helltu næst tómatdósinni, baunadósinni og soðinu út í og hrærðu vel upp í botninum. Eldaðu í ofni með átylltu loki í 40 mínútur við 180°C. Taktu pottinn út úr ofninum, hrærðu upp í og eldaðu með átylltu loki í um 30 mínútur til viðbótar.

Eftir ofntímann er maís, sojahakk, rjómaostur, edik og saxaðir kóríanderstilkar sett út í og hitað upp ef þarf. Saltað eftir þörfum. Gott er að bera fram með muldu nachos, rifnum osti, gvakamóle, sýrðum rjóma, kreistum limesafa, pikkluðum rauðlauk og fersku kóríander eða söxuðum vorlauk.