Tónlistin mín er undir áhrifum frá söngvaskáldum Kanada þar sem ég ólst upp,“ segir tónlistar- og blaðakonan Jelena Ciric og nefnir í því sambandi sérstaklega þau Joni Mitchell og Leonard Cohen.

„En einnig frá þjóðlagatónlist Serbíu. Ég ólst upp á milli tveggja heima og tónlist var alltaf mín leið til að kanna hver ég væri í raun og veru eða hvaða stað ég tilheyrði,“ segir Jelena sem syngur og spilar á píanó.

Jelena fæddist í Serbíu en ólst upp í Toronto í Kanada þangað sem fjölskylda hennar flutti þegar hún var fjögurra og hálfs árs þannig að hún segir að í gegnum tónlistina hafi hún jafnvel reynt að skapa sjálfri sér eitthvað sem hún gæti kallað „heimili“.

Djassprófessor í Mexíkó

„Ég lærði klassískan söng í háskóla og fór svo í mastersnám í Berklee College of Music, sem var nýbúinn að opna útibú í Valencia á Spáni og hitti manninn minn sem er Íslendingur en við fluttum ekki strax til Íslands,“ segir Jelena sem fékk prófessorsstöðu við háskólann Universidad Veracruzana í Mexíkó þar sem hún var deildarstjóri djasssöngdeildar í tvö ár.

„Við fluttum til Íslands árið 2016 og höfum búið hér í fjögur ár. Mér finnst það bara mjög fínt og held að ég hafi verið spenntari fyrir því að flytja hingað heldur en maðurinn minn þegar við tókum þessa ákvörðun,“ heldur Jelena áfram á ómfagurri íslensku.

Skapandi pláss

„Ég tala fimm tungumál; serb–nesku, ensku, frönsku, spænsku og íslensku, og það má kannski segja að tungumál séu hin ástríðan mín á eftir tónlistinni,“ segir Jelena brosandi og ef til vill ekki furða að hún hafi í það minnsta tveggja heima sýn á tilveruna.

Textinn í In Time er að hluta til innblásinn af íslensku landslagi, í Landbroti, þar sem ég hef eytt miklum tíma í sumarbústað tengdafjölskyldunnar, segir Jelena um aðra smáskífuna af plötunni.
Mynd/Juliette Rowland

„Þetta var líka allt svo nýtt fyrir mér og bara æðislegt hvað það er mikið af skapandi fólki hérna. Til dæmis í tónlist og mér finnst líka æðislegt að búa á aðeins minni stað en áður,“ segir Jelena sem samhliða tónlistarsköpuninni starfar sem blaðamaður hjá Iceland Review. „Fyrir mig sem nýjan Íslending get ég varla hugsað mér betri leið en blaðamennsku til að læra um og komast inn í samfélagið. Það er skemmtilegt að vera blaðamaður vegna þess að maður er alltaf að læra eitthvað nýtt.“

Tvírætt skjól

„Við bjuggum í aðeins stærri borg í Mexíkó áður en við komum hingað. Það var gaman og fullt af lífi og svona en mér fannst líka rosalega næs að koma hingað og hafa meiri ró í lífinu. Það er bara meira pláss á Íslandi og ég held að það sé svo hollt fyrir listamenn að hafa pláss,“ segir Jelena sem telur víst að skapandi hugsun eflist í slíku andrúmi.

„Ég var búin að gefa eitthvað út fyrir nokkrum árum en tónlistin þá var svolítið öðruvísi. Kannski aðeins meira serbnesk þannig að ég lít á þetta alveg sem nýja byrjun,“ segir Jelena um breiðskífuna Shelters one sem kemur út á föstudaginn.

„Lögin eru mjög persónuleg og hvert og eitt snýst um tilfinningu eða upplifun sem maður fer í gegnum einn,“ segir Jelena um lögin á plötunni.
Mynd/Juliette Rowland

„Titill plötunnar hefur tvær merkingar. Hvert og eitt lag er athvarf, skjól þar sem ég og hlustandinn líka, getum gengið inn og spurt spurninga eða upplifað tilfinningu í friði. Síðan lýkur laginu en lífið heldur áfram og maður er vonandi í betri stöðu til að takast á við það,“ segir Jelena og bætir við að hin merkingin felist í því að lesa úr titlinum eitthvað sem veitir einhverjum einum skjól.

Spáð í ástina og lífið

„Lögin eru mjög persónuleg og hvert og eitt snýst um tilfinningu eða upplifun sem maður fer í gegnum einn.“

Fyrsta smáskífulagið af plötunni, Lines, kom út í síðustu viku og Jelena fylgdi því strax eftir með tónlistarmyndbandi á YouTube. „Lines er eins og mörg lög úr þjóðlagahefðinni að því leyti að það segir sögu. Í þessari sögu er söguhetja sem vill trúa, eins og við flest, að það sé auðvelt að breyta lífinu. Til dæmis með því að hitta spákonu eða verða ástfangin… og þá allt í einu meiki lífið sens. Hvort ég trúi því eða ekki? Það segir sig sjálft þegar þú hlustar á lagið,“ segir Jelena mátulega dularfull.