Kraumsverðlaunin verða afhent í þrettánda sinn í næsta mánuði þar sem verðlaun verða veitt fyrir þær íslensku hljómplötur sem þykja hafa skarað fram úr á árinu hvað varðar gæði, metnað og frumleika.

Dómnefnd verðlaunanna hefur nú valið tilnefningar til Kraumsverðlaunanna í ár, hinn svokallaða Kraumslista, og þar er að finna tónlist úr öllum áttum. Tuttugu hljómsveitir og listamenn eru tilnefnd fyrir plötur sínar í ár, meðal annars Bríet, Cyber, Gugusar og Yagya. Á listanum má finna hinar ýmsu tónlistarstefnur og strauma; popp og rokktónlist, teknó, hip hop, jazz, tónverka- og tilraunatónlist.

Rúmlega sjötíu hlotið verðlaunin

Fram kemur í tilkynningu að greinilegt sé að mikil gróska er í íslensku tónlistarlífi hvað útgáfurstafsemi varðar, enda fór dómnefndin yfir og hlustaði á 439 hljómplötur og útgáfur sem komu út á árinu við val sit. Mun hún nú velja sex breiðskífur af þeim sem nú hafa verið tilnefndar sem hljóta munu Kraumsverðlaunin 2020.

Kraumsverðlaunum er ætlað að kynna og styðja við plötuútgáfu íslenskra listamanna og hljómsveita. Alls hafa rúmlega sjötíu listamenn og hljómsveitir hlotið verðlaunin fyrir plötur sínar, flestir snemma á ferli sínum.

Meðal þeirra listamanna sem hlotið hafa Kraumsverðlaunin til þessa eru Auður, Cell7, Daníel Bjarnason, Hildur Guðnadóttir, Hjaltalín, Lay Low, Mammút, Ólöf Arnalds, Retro Stefson og Sóley.

Tilnefningar til Kraumsverðlaunanna 2020:

  • 0 - Entity
  • Andartak - Constructive Metabolism
  • Asalaus - Asaleysing
  • Bára Gísla - HIBER
  • Bríet - Kveðja, Bríet
  • Buspin Jieper - VHS Volcanic / Harmonic / Sounds
  • Celebs - Tálvon hinna efnilegu
  • Cyber - Vacation
  • Gugusar – Listen to this Twice
  • Ingibjörg Turchi - Meliae
  • K.óla - Plastprinsessan
  • Magnús Jóhann - Without Listening
  • Mengun - Þrettán tólf
  • Salóme Katrín - Water
  • Skoffín - Skoffín hentar íslenskum aðstæðum
  • Supersport! - Dog Run EP
  • Tucker Carlson's Jonestown Massacre - Ingilín
  • Ultraflex - Visions of Ultraflex
  • Volruptus - First Contact
  • Yagya - Old Dreams And Memories

Kraumslistinn og Kraumsverðlaunin eru valin af níu manna dómnefnd sem í ár skipa Árni Matthíasson (formaður), Arnar Eggert Thoroddsen, Helga Þórey Jónsdóttir, Maria Lilja Thrastardottir Kemp, Óli Dóri, Rósa Birgitta Ísfeld, Tanya Lind, Trausti Júlíusson og Þorbjörg Roach Gunnarsdóttir.

Aurora velgerðarsjóður stendur að Kraumsverðlaununum.