Berglind Hreiðars matar- og kökubloggari með meiru elskar fátt meira en að setja saman sælkerakræsingar sem tengjast ákveðnu þema eða tilefnum og hrekkjavakan er þar engin undantekning. Við fengum hana til að deila með lesendum partýbakka í ár sem steinliggur fyrir þá sem vilja gleðja bæði augu og munn í Hrekkjavökupartýinu.

„Þegar ég var búin að liggja á veraldarvefnum í leit að einföldum hugmyndum af snarli fyrir Hrekkjavökuna útbjó ég þennan bakka. Ég setti saman allt það sem mér fannst sniðugt og meira til og útkoman var alveg stórkostleg. Hér eru á ferðinni uppskriftir og hugmyndir sem allir ættu að ráða við að gera, svo lengi sem þeir hafa smá þolinmæði og nennu fyrir því að raða fallega saman,“ segir Berglind sem veit fátt skemmtilegra en að setja saman kræsingar fyrir tilefni eins og þetta.

Hér er bæði snarl sem er matarkyns, grænmeti og ávextir í bland við kex, snakk og sælgæti þannig að allir ættu að geta fundið eitthvað við sitt hæfi. Hægt er að fylgjast með Berglindi á bloggsíðu hennar Gotterí og gersemar.

FBL Hrekkjavokusnakk-2 -1024x683.jpeg

Berglind er ótrúlega hugmyndarík þegar kemur að því að setja saman frumlegar og skemmtilegar kræsingar sem gleðja gestina./Ljósmyndir Berglind Hreiðars.

Partýbakki fyrir Hrekkjavökuna ógurlegu

FBL Hrekkjavokusnakk-3-1024x683.jpeg

Oreo köngulær

Oreo kex

Gamaldags lakkrís

Hrekkjavökuaugu

  1. Skerið lakkrísplöturnar niður í mjóa strimla (fyrir köngulóarfætur).
  2. Ýtið varlega í kremið með tannstöngli á fjórum stöðum sitthvoru megin til að gera smá holu fyrir lakkrísinn/fæturna.
  3. Stingið lakkrísnum í og kroppið smá meira krem í tannstöngulinn til þess að setja á augun og festa þau með því.
FBL Hrekkjavokusnakk-6-683x1024.jpeg

Múmíupylsur

Pylsur (gott að miða við 1 á mann)

Tilbúið pizzadeig (upprúllað)

Hrekkjavökuaugu

Hunt‘s tómatsósa

Sinnep

  1. Hitið ofninn í 200°C.
  2. Rúllið pizzadeigið út og skerið niður mjóa strimla með pizzahníf til að vefja utan um pylsurnar.
  3. Vefjið 2-3 strimlum utan um hverja pylsu og reynið að láta endana snúa niður, raðið á bökunarplötu og bakið í 10 mínútur eða þar til deigið fer að gyllast.
  4. Augun festi ég eftirá með því að setja smá tómatsósu á þau og „líma“ við.
  5. Sprautið tómatsósu í skál, sprautið sinnepi í miðjuna og nokkra hringi til viðbótar. Takið síðan tannstöngul og dragið frá miðjunni og út að brún skálarinnar, þá myndast „köngulóarvefur“.
FBL Hrekkjavokusnakk-7-1024x683.jpeg

Eplatennur

Epli

Hnetusmjör

Litlir sykurpúðar

  1. Skerið eplin niður í sneiðar
  2. Smyrjið hnetusmjöri á aðra hliðina á báðum sneiðunum.
  3. Raðið sykurpúðum ofan á hnetusmjörið á annarri sneiðinni til að búa til tennur og leggið hina sneiðina ofan á.
FBL Hrekkjavokusnakk-7-683x1024.jpeg

Hrískökumúmíur

  • 60 g smjör
  • 260 g sykurpúðar
  • 150 g Rice Krispies/blásið hrísmorgunkorn
  • Matarolíusprey
  • 300 g hvítt súkkulaði
  • Hrekkjavökuaugu
  1. Klæðið um 25 x 25 cm kökuform að innan með bökunarpappír og spreyjið næst með smá matarolíuspreyji svo auðveldara verði að ná kökunni úr til að skera hana í bita.
  2. Bræðið smjör í potti við vægan hita.
  3. Blandið sykurpúðunum saman við og hrærið þar til þeir hafa bráðnað saman við smjörið og loftkennd blanda myndast.
  4. Takið af hellunni og hrærið hrísmorgunkorninu saman við. Blandan minnir smá á klístraðan köngulóarvef og þannig á hún einmitt að vera.
  5. Setjið nú alla blönduna yfir í kökuformið og þjappið niður með sleif, gott er að setja smá matarolíusprey á sleifina líka svo hún klístrist síður við.
  6. Þjappið niður eins og þið getið og sléttið úr toppnum, kælið síðan í um 30 mínútur.
  7. Nú ætti blandan að vera orðin stíf í sér og auðvelt að lyfta henni á bökunarpappírnum upp úr forminu yfir á borð/bretti. Skerið kökuna í tvennt og því næst í ílanga bita, blandan gefur um 16 „múmíur“.
  8. Bræðið hvíta súkkulaðið og dýfið hverri múmíu ofan í það (c.a 1/3 af kökunni), leggið á bökunarpappír og setjið hrekkjavökuaugu í súkkulaðið áður en það storknar.
  9. Þegar búið er að dýfa öllum kökunum og setja á þær augu má nota restina af súkkulaðinu og renna því óreglulega yfir, þvers og kruss til að klára að útbúa múmíu.
FBL Hrekkjavokusnakk-8-683x1024.jpeg

Annað á bakka

  • Mandarínur með saltstöng til að gera „grasker“
  • BUBS nammi
  • Lakkrís Dumle karamellur
  • Hunangsmelóna
  • Ídýfa
  • Paprika, gulrætur og agúrka í strimlum
  • Maarud snakk með papriku