Donald Trump fyrr­verandi Banda­­­ríkja­­­for­­­seti er kominn með 9. gráðu svart belti í kóresku sjálfs­varnar­í­­­þróttinni Taekwondo. Það er hæsta beltið sem hægt er að fá í í­­­þróttinni en Vla­dimír Pútín Rúss­lands­­for­­seti hlaut sama heiður árið 2013.

Lee Dong-seop, for­­­maður Kukkiwon sem er æðsta yfir­­­vald heims í Taekwondo, af­henti Trump heiðurs­beltið á heimili hans í Mar-a-lago í Palm Beach á Flórída um helgina og var for­­­setinn fyrr­verandi klæddur í Taekwondo-galla.

„Mér hafði borist það til eyrna að Trump væri mikill á­huga­­­maður um Taekwondo,“ sagði Lee við at­burðinn en sam­­­kvæmt Daily Mail var það Suður-kóreu­­­maður bú­­­settur í Banda­­­ríkjunum sem skipu­lagði hann.

„Það er mér sannur heiður að fá heiðurs­belti og ég held að Taekwondo sé frá­bær bar­daga­í­þrótt fyrir sjálfs­varnir“, sagði for­setinn fyrr­verandi.

Trump lofaði því að mæta í gallanum á Banda­­­ríkja­þing ef hann kæmist aftur í Hvíta húsið en margt þykir benda til þess að hann bjóði sig fram í próf­­­kjöri Repúblikana fyrir for­­­seta­­­kosningarnar 2024.